Волжский районысо Памар школышто РСФСР-ын да МАССР-ын сулло артистше Г.Копцевын шочмыжлан 75 ий, Марий Элын калык писательже Н.Рыбаковын шочмыжлан 85 ий темме лӱмеш «Волгалтеш Памар ӱмбалне кок шӱдыр, чолгыжын, йӱлен» драме конкурс эртен.
Пайремыште М.Рыбаковын тукым шӱжарже Л.Шишкина, Мер каҥашын Волжский районысо пӧлкажым вуйлатыше Л.Сергеева лийыныт. Мероприятийын икымше ужашыштыже Геннадий Копцевын да Миклай Рыбаковын илышышт, творческий корнышт нерген презентаций лийын гын, кокымшо ужаш драме конкурслан пӧлеклалтын. Тушто районысо ныл школ гыч тунемше-влак усталыкыштым тергеныт. Икымше верым Памар школын творческий коллективше сеҥен налын, кокымшым Пӧтъял ден Карай школ-влак пайленыт, кумшыш Кугу Корамас школ лектын.
Мероприятий кугу кӱкшытыштӧ эртен. Тудо тунемше-влакын драматургийыштат мастарлыкым ончыктен кертмыштым пеҥгыдемден.
М.ИВАНОВА.
