Йошкар-Оласе Марий паркыште пу гыч пӱчкедыше-влакын «Марий калыкын легендыже-влак» фестиваль-конкурс почылтын.
Тений фестиваль кокымшо гана эрта. Арня жапыште участник-влак ойырен налме скульптурым пӱчкедаш тӱҥалыт. Ты гана нуно марий талешке-влакын образыштым почын пуышаш улыт.
Фестивальын пытарыш кечынже 10 шагатлан эше ик конкурс лиеш, Шагатат пеле жапыште участник-влак кундемыштына илыше янлык ден кайыквусын скульптурыштым бензопила дене пӱчкедаш тӱҥалыт.
Фестивальыш тений 9 еҥ ушнен. Нуно Марий Эл (нылытын), Удмуртий (нылытын), Моско область гыч улыт. Ижевск гыч ик мастар ӱдырамашат толын. Пашаштым шым еҥан жюри акла. Мероприятийым торжественно почмо годым саламлыме шомакым Марий Эл Кугыжаныш Погын вуйлатыше Михаил Васютин, тӱвыра, савкытыш да калык-влакын пашашт шотышто министрын пашажым жаплан шуктышо Михаил Матвеев, оласе мэрын пашажым жаплан шуктышо Антон Трудинов да молат ойленыт.
Светлана Носова
Снимкыште: конкурсыш ушнышо-влак.
Светлана Носован фотожо.
