Тачысе лаштыкын унаже – Йошкар-Оласе Рӱдӧ тӱвыра да каныме паркыште пашам ыштыше художник-оформитель Наталья Кондакова.
Курыкмарий кундемын ӱдыржӧ тыште кандаш ий тырша. Ондак кинолекторийыште администратор лийын гын, варажым, жап эртымеке, угыч паркышкак пӧртылын.
Наталья Аверкиевна дене фестиваль-конкурсышто палыме лийынна, а мутланымашнаже тудын паша верыштыжак лие. Тудо парк нерген сӱретчын шинчаончалтышыж дене радамлен каласкалыш. Мутат уке, тыштыже кажне еҥ шкан келшыше верым садак муэш: икте тыглай гына теҥгылыште шинчаш йӧрата, весылан аттракционышто лияш келша, кумшо кече волгалтше ыресан черкыш пура, нылымше капкылым вияҥдаш спортплозщадкыш вашка…
– Ме кажне ийын паркым У ийым, Роштом, Кугечым, Пеледыш да моло пайремым эртараш келшышым ямдылена, – ойла Наталья Аверкиевна. – Изи годсек пеледышым йӧратем, сандене тиде паша мылам келша. Ме вет кажне пайремым сылнештарена, сандене тудым моторым, ончычсо деч ойыртемалтшым ышташ манын, эре шонем. Вет, эре иктым ончен, шерет темеш вет. Теве баннер-влакат тоштемыныт, южыжым вашталтыман. Икманаш, чылажымат жапыштыже уэмден шогыман. ӱмаште парклан 80 ий темын ыле. «Йӧратыме парклан – 80 ий» фотозоным ямдыленам: тудын ончылно еҥ-влак эреак войзалтыныт. Жап эртыме семын паша лектынак шога. Теве Пеледыш пайрем лие, ынде Самырык-влакын кечышт… Тисте-шамычымат южыжым шкан ургаш логалеш. Паркыште чылажат шот дене лийшаш: пушеҥгым пӱчкедыман, арулыкым эскерыман. Калык канаш толеш, чыла экшык вигак коеш. Эн шуко паша – У ийым палемдыме жапыште. Эсогыл пандемий годымат онлайн йӧн дене эртаралтше мероприятий-шамычлан залым сӧрастараш логалын. А такшым шонымашем ятыр уло, но чылажым илышыш пурташ – манаш веле.
М.СКОБЕЛЕВ
Авторын фотожо.
