Марий Эл правительствын черетан заседанийыштыже тазалык аралтыш сферым цифраҥдыме да пашам аралыме нерген мутланеныт.
Заседанийым республикым вуйлатыше Юрий Зайцев вӱден.
Ӱмаште Марий Эл модернизироватлыме пашам шуктымо шотышто 19-ше верыш лектыш да пытартыш кум ийыште 83-шо гыч 64-ше пункт марте нӧлталтын. Тидым «Цифромед» ООО зависитлалтдыме рейтингыштыже палемден.
Тазалык аралтыш министр Владимир Гладневын мутшо почеш, кугыжаныш увер системыш регионысо чыла медицине организацийым ушымо. Пытартыш вич ийыште медик-шамычлан ГИСЗ-ш пураш 7 тӱжем наре автоматизироватлыме паша верым ыштыме. Системыште кече еда 1,8 тӱжем наре (чумыр чот гыч 84 процент) врач профильный документацийым вӱда.
Калык специалист-шамычын приёмышкышт чӱчкыдынжӧ дистанционно возалтеш. 2024 ийыште тиде чот 85 процент марте кугемын, ончылийысе дене таҥастарымаште – 1/3 ужашлан. Кугыжаныш да муниципал услуго порталыште «Мыйын тазалыкем» манме личный кабинетын сервисше дене пайдаланыше-влакынат чотышт 258 тӱжем еҥ марте ешаралтын. Тиде цифр вич ийыште 3,4 пачаш кугемын.
2025 ийыште искусственный интеллект гоч 17 тӱжем наре снимкым да 590 тӱжем наре картым колтымо.
«Тиде цифр гына огыл, тыгак жап, тазалык да сай йӧн. Ончыкыжым тылечат сай качестван медицинылан эше у технологий ден сервис-влак лийыт», – палемден Юрий Зайцев.
Заседанийыште регионысо предприятийлаште пашам аралыме нерген кумдан мутланеныт.
Паша да социальный аралымаш министрын пашажым жаплан шуктышо Эдуард Загрутдинов регионысо организацийлаште паша йӧн-влак дене палдарен. Федерал кугыжаныш увер системын данныйже почеш, ӱмаште Марий Элыште 1,6 тӱжем пашам пуышо паша йӧным аклыктен. Ведомство нуным кажне тылзын терга да тидын шотышто учётым вӱда. Тымарте 29 тӱжем утла паша верым аклыме, тушто 33 тӱжем наре еҥ пашам ышта.
Паша верлаште лӱдыкшым кораҥдыме, келшыше инструктаж ден тергымашым эртарыме дене пытартыш вич ийыште производствышто сусыргымо случай 30 процентлан шагалемын. Тиде кугыжанышын, бизнесын да профсоюз-влакын иквереш ыштыме паша надырышт.
Марий Элым вуйлатышын пресс-службыжын уверже негызеш Маргарита ИВАНОВА ямдылен
