КУЧЕМЫШТЕ

Партий кӱын шуын

24 мартыште Пенсионер-влакын социальный чынлык верч россий партийыштын Рӱдӧ советшым вуйлатыше Владимир Бураков Марий Элыш калыкым партийын Кугыжаныш Думыш сайлымашке кайыме программыжын проектше дене палдараш толын.
Тудо партийын тенийысе сайлыме ийын планже да задачыж-шамыч дене ончыч регионысо журналист-влакым палдарен. Тылеч вара Марий Элым вуйлатыше Александр Евстифеев дене вашлийын. Кастене регионысо пӧлкан штабше да активше дене ончыкылык паша радам нерген мутланен.
Сайлымаш деч ончычсо программе нерген каласкалымыж годым партийым вуйлатыше тудын негызшылан сайлыше-влакын темлымашышт ден эксперт-шамычын иктешлымашыштым налмым палемден.
– Пенсионер-влакын партийышт ынде визымше ий Россий Федераций правительстве пеленысе Финанс университет, социолог, политолог, юрист, экономист, медицине да образований алан гыч еҥ-влакым ушышо науко сообществе дене кылым куча. Идалык мучко ме науко да практике конференций-влакым, регионласе калык дене вашлиймаш-шамычым эртарена, йыргешке ӱстел йыр погынен мутланена, а идалык мучаште иктешлыше мероприятийыш чумыргена. Лач тунам университетын экспертше ден аналитикше-шамыч, палемдыме каҥашымаш-влаклан эҥертен, мыланна кӱлешан темлымашым пуат, – манын В.Бураков.
Проектын тӱҥ задачыже пенсий, пашам ыштыше пенсионер ден пенсий ийготыш лишемше-влакын праваштым аралыме, медицине обслуживанийын качествыжым саемдыме, гериатрический полышым пуымо да моло социальный йодышым рашемдымашке виктаралтын. Тиде радамыштак экономике ден промышленностьым, «А» тӱшкаш пурышо предприятийым индустриализаций кӱшеш вияҥдыме, тыгак кадр политикым шотыш кондымо йодыш-влак шогат.
– Таче сайлыме участкылаште тӱҥ шотышто илалше тукымым ужына. Тудо утларак дисциплинированный да утларак ответственный. Илалше-шамычлан кеч-могай йӱклымаш – пайрем гына огыл, тыгак кугу ответственность. Кызыт мемнан парламентыште пенсий ийготыш лишемше ден пенсионер-влакын интересыштым аралыше илалше граждан-шамыч шагал улыт, – палемдыш лидер.
Владимир Юрьевичын мутшо почеш, партий эн ончычак пенсионер-шамычлан сай илышым ыштыме, ты шотыштак пенсийым кугемдыме йодышла дене пашам ышта.
– Российыште пенсийын кугытшо кокла пашадарын 60-70 процент ужашыж наре лийшаш манын шотлена. Мыйын шонымаште, элыштына пенсийын кокла кугытшо 20-22 тӱжем теҥге лийшаш. Мут толмашеш, мыйын моско пенсием – 19 тӱжем теҥге, – рашемден В.Бураков.
Партийым вуйлатыше социальный да пенсий обеспечений гай темымат тарватен. Тудын шонымыж почеш, тиде аланыште ик нормативный акт лийшаш, молан манаш гын социальный обеспеченийыште икте-весылан келшен толшо але ваштареш шогышо шуко документ уло, да тиде умылыдымашыште пенсионер-влак орланат.
— Айдемын илышыжым шочмо гыч пытартыш кече марте ончыктышо, ты шотыштак гражданинын праваж ден обязанностьшым, кугыжанышын тиде еҥ ончылно праваж ден обязанностьшым регламентироватлыше социальный кодексым ышташ кӱлеш. Тидын дене ме Россий Федераций Конституцийын 7-ше статьяжым илышыш пуртен кертына. Тушто Россий социальный кугыжанышлан шотлалтеш манын возымо, – мане Владимир Юрьевич.
Партийым вуйлатышын ойжо гыч, тазалыкым аралыме аланыште эртарыме оптимизаций нимо сайыш конден огыл, тылеч посна кугурак тукымлан геронтологический да гериатрический полышым пуымо паша вараш кодын вияҥеш. Российыште 47 млн. пенсионер ила, ты чот гыч 37 млн. еҥже – илалше, 5 млн. еҥже – военный пенсионер, молыжо инвалидность шотышто пенсийыш лектыныт. Тынар еҥлан элыштына сертифицироватлыме 450 врач-гериатр гына пашам ышта! Мутлан, йоча поликлинике шуко, а кугурак тукымлан лӱмын келыштарыме медицине тӧнеж уке, рӱдер ден кабинет-шамыч веле улыт. Партийын задачыже – регионлаште геронтологический да гериатрический полышым пуымо пашам лийме вияҥдаш.
– Шушаш арняште Российысе Врач-влакын ассоциацийышт дене соглашенийым ыштена. Тушто медицине сообществе да медицине университет-шамычын ректорышт ончылан кугурак тукым дене пашам ышташлан гериатрий шотышто специалист ден сертифицироватлыме врач-шамычым ямдылыме нерген йодышым шындена, – палдарыш В.Бураков.
Ӱмаште Пенсионер-влакын социальный чынлык верч россий партийышт сайлымашым эртарыме регион-влакын 11 законодательный погынымашыж кокла гыч индешыштыже участвоватлен да шымытыштыже сеҥышыш лектын. В.Бураковын мутшо гыч, сайлымаште кокла показатель 5 гыч 10 процент марте лийын.
Тений партий Кугыжаныш Думыш сайлымаш деч посна эше 39 законодательный погынымаш кокла гыч кумло кокытыштыжо сайлымаште участвоватлаш тӱҥалеш. Партийын Рӱдӧ советыштыже законодательный погынымаш-влак шотышто 5 процент деч кугу показательыш шумылан ӱшанат.
– Тидыже сеҥымашын негызше лиеш. Тудо Кугыжаныш Думыш шкенан еҥна-влакым пурташ йӧным ышта. Пенсионер-влакын партийышт сайлымаште чолган участвоватлаш кӱын шуын. 2003 ийыште сайлыше-влак партийланна 3 процент йӱкым пуэныт. 2016 ийыште ик мандатан кандидантна-шамычым сайлымаш гыч кораҥдышт, туге гынат партий 5 млн. утла йӱкым погыш. Тиде пеш сай эҥертыш, кугу ӱшан, – вашлиймашым мучашлыш Виктор Бураков.
М.ИВАНОВА
Опубликовать в Одноклассники

Добавить комментарий