3 апрельыште Шернур районышто илыше Анна Кутузова 104 ийым темен.
Илалше ӱдырамашын ӱмыргорныжо куштылго манаш огеш лий. Анна Григорьевна Шернур районысо Кӱчыкэҥер ялыште шуко икшыван Коршуновмытын ешыштышт шочын. Йоча пагытше неле лийын гынат, изинекак пашам йӧратымыже да чаткалыкше дене ойыртемалтын. Школышко улыжат ик ий коштын, вараже тудым кугурак изаже мӧҥгыштӧ туныктен.
Вуеш шушо ӱдырым шке ялже гычак Андрей Иванович Кутузов тулартен. Самырык мужыр черкыште венчаялтме деч вара пырля илаш тӱҥалын. Анна Григорьевна ден Андрей Иванович вате-марий улмыштым закон почеш пенсийыш лекмышт деч ончыч веле пеҥгыдемденыт.
Самырыкышт годым еш пиалышт кужун шуйнен огыл: сар тӱҥалмеке, Андрей Иванович икымше кечылаштак элым аралаш каен. Анна Григорьевна, шкет кодмекыже, Юмо деч пелашыжым илышым да тазам пӧртылташ сӧрвален, фронт гыч толшо кажне серышым шӱмжӧ пырткен налын.
Сар пагытыште Анна Коршунова уло яллан ӱшанле эҥертыш лийын. Тудо колхозышто счетоводлан пашам ыштен, грамотдымо ӱдырамаш-шамычлан фронт гыч толшо серышлам лудын, пелашышт ден эргыштлан вашмутым возен. Шкеже тургыжланен гынат, чылаштым умылаш, кажныжлан полшаш тыршен.
Андрей Иванович танкист лийын. Ик кредалмаште нелын сусырген. Госпитальыште эмлалтмыж деч вара кок арнялан шочмо кундемышкыже вийым погаш, родо-тукымжым ужаш толын, да пелашыже тудлан 1945 ийыште икымше йочам – Зоя ӱдырыштым – пӧлеклен. А кок ий гыч еш озат мӧҥгӧ пӧртылын.
Тыныс жапыште Анна Григорьевна ден Андрей Иванович эше вич йочам: Алексейым, Галинам, Нинам, Любам да Розам – поче-поче ыштеныт. Ача ден ава чыла йочалан сай шинчымашым пуэныт, йол ӱмбаке шогалтеныт.
Таче курым утла илыше пагалыме ӱдырамашын 11 уныкаже, уныкаже-влакын 12 шочшышт да 4 кугезе уныкаже улыт.
Анна Григорьевнам шочмо кечыж дене Шернур район администрацийын пашаеҥже-влак саламлаш миеныт, илалше ӱдырамашлан Марий Элым вуйлатыше Юрий Зайцевын саламлымашыжым, пӧлекым да пеледыш аршашым кучыктеныт, пеҥгыде тазалыкым, еш пиалым, тыныс илышым тыланеныт.
Маргарита ИВАНОВА
Снимкыште: Анна Кутузова уна-влак коклаште.
Марий Элын Паша да социальный аралымаш министерствыжын фотожо.
