Марий Эл вуйлатыше Александр Евстифеев Россий Юстиций министерствын Нижегородский областьысе тӱҥ управленийжын вуйлатышыже Михаил Коняхин дене пашаче вашлиймашым эртарен.
Туштак регионысо управленийын у начальникше дене палымым ыштеныт. Тиде должностьышто пашам Александр Батурин ышташ тӱҥалын.
— У конституционный положенийым илышыш пуртымо дене шуко паша вуча. Региональный законодательствын мониторингшымат, тудын экспертизыжымат эртарыман. Тыгай сынан пашам мый ятыр шуктенам, сандене кугытшым раш палем, — палдарен республик вуйлатыше.
Россий минюстын Марий Элысе управленийжын у начальникше дене палымым ыштымыж годым Михаил Коняхин палемден: тудын паша опытшат кугу да шкежат – грамотан специалист.
— Александр Владимирович Батуриным управлений начальниклан ротаций шот дене шогалтыме. Але марте тудо Россий юстиций министерствын Оренбург областьысе управленийжым вич ий вуйлатен, — каласен тудо.
Марий Эл вуйлатышын организаций да аналитике виктемжын уверже негызеш Л.КАМАЛЕТДИНОВА ямдылен.