Шернур кундемлан – 100 ий
Кучем ден мер калык – ик шӱлыш дене
Шернур районын 100 ияш лӱмгече идалыкшым сылнын да тӱвыргын эртарен колташ шонымаш дене кодшо вӱргечын Йошкар-Олаште районысо кучемын еҥже-влак «Истоки» Шернур землячествын активше дене (чылаже –16 еҥ) вашлийыныт.
Муниципальный образованийым вуйлатыше С.Адиганов, район администрацийым вуйлатыше А.Кугергин, культур пӧлкам вуйлатыше А.Ямбулатова эртарышаш мероприятий план дене палдарышт. Александр Викторовичын ойлымыж почеш, нуно оласе Шернур землячествылан кугу ӱшаным ыштат. Сандене, идалыкшат, лӱмгечыже-влакат чынже денак пайдалын эртышт манын, вашлиймаште ятыр оҥай темлымашым, ой-каҥашым ыштыме. Кажныж нерген ме лудшына-влакым палдараш тӱҥалына.
Ик эн кугу мероприятийже-влакым – торжественный погынымашым, Пеледыш пайремлан 100 ий теммым (тудым ӱмаште эртараш пандемий чаракым ыштыш) – июньышто эртараш палемдыме. Кумшо кугу сомылжо Шернур кундемысе калыклан веле огыл шерге Йыван Кырла дене кылдалтын. Тудлан Шернур поселкышто чапкӱм шогалташ кӱлмӧ нерген мутым эше кок ий ончычак тарватыме да тидлан оксам погаш тӱҥалме амал дене землячестве лӱм дене кок концертым эртарыме ыле. А.Кугергинын палемдымыж почеш, ты проектым илышыш шыҥдараш 4 миллион наре теҥге окса кӱлеш. Тачысе кечылан район администрацийым вуйлатыше ты йодыш дене посна распоряженийым луктын, оргкомитет ышталтын, тушто район вуйлатыше, землячествын еҥже ден специалист-влакат улыт. Ты кугу шонымашым илышыш пурташ Марий Элын Тӱвыра, савыктыш да калык паша шотышто министерствыж велымат полышым сӧреныт. Тений чапкӱн эскизшым ышташ, оксам чумырымо пашам шукташ лийме. Эскиз проект шотышто кызыт конкурсым увертареныт. Сеҥышым мартыште увертарат.
А чапкӱлан оксам могай реквизит почеш колтышашым лишыл жапыште увертарат.
Светлана Пехметова
