Семеновка селаште кокымшо гана иканаште «Пеледыш пайрем», «Сабантуй» да «Руш куэ» пайрем-влак эртеныт.
Йӱр йӱрын гынат, Знаменский посёлкышто, Семеновка селаште да Данилово ялыште илыше рвезе-влак ын командышт футбол дене модыныт. Пайрем концерт да тӱшка мероприятий-влак В.С.Архипов лӱмеш Семеновка кыдалаш школышто эртеныт. Знаменский посёлкысо культур рӱдер ден Республиканский татар культур рӱдерыш коштшо-влакын йоҥгалтарыме мурышт пайремыш погынышо калыкын кумылжым савырен. Молгунамсылак «Куреш» татар-башкир кучедалмаш оҥай лийын. Тушто сеҥышыш лекше Мунир Галямовлан йӱла почеш приз шотеш тагам кучыктеныт. Кирам нӧлтымаште эн тале семын Александр Лебедевым палемденыт. Ӱдыр-влак эн сай пеледыш аршашым ыштыме «Кеҥежымсе чия-влак» конкурсышто мастарлыкыштым тергеныт. Эн сӧрал пеледыш аршашым Кристина Макматова поген. Конкурс ден таҥасымашке ушнышо да сеҥышыш лекше чыла еҥым Чап кагаз да кумылаҥдыше приз дене палемденыт, Семеновка селан официальный огыл гербшым сӱретлыман магнитым пӧлекленыт.
Е.Садовин.
