Марий Элыште грипп ваштареш прививкым ыштыме кампаний шукертак тӱҥалын. Тымарте регионыштына илыше чумыр калык гыч 142 тӱжем утла – 20 процент – еҥым вакцинироватлыме. Тиде ужашым эпидсезон мучашлалтме марте 60 процент йотке шукташ палемдыме.
Республикышкына федеральный бюджетын средстваж кӱшеш грипп ваштареш вакциным ситышын кондымо: 64 тӱжем наре дозым – йоча-влаклан да 174 тӱжем наре дозым – кугыеҥ-шамычлан.
«Медицине организацийлаште грипп деч вакцинацийым икмыняр препарат дене эртарат. «Ультрикс Квадри» вакциныште гриппын А да В вирусшо-шамыч деч штаммын ныл видше уло, да тиде препарат йоча ден мӱшкыран ӱдырамаш-влаклан палемдалтын. Кугыеҥ-шамычлан кум штамм деч аралыше «Совигрипп» ден «Флю М» вакцине-влак темлалтыт», – палдара регионын тазалык аралтыш министржын алмаштышыже Татьяна Бастракова
«Вакцинаций грипп дене черланыме деч аралыше эн сай йӧнлан шотлалтеш. Сезонный чер ваштареш прививкым ыштыме кампанийын тӱҥ шонымашыже калыкын иммунитетшым пеҥгыдемдыме дене кылдалтын», – увертара Роспотребнадзорын Марий Элысе виктемжын вуйлатышыже Светлана Булатова.
Марий Элым вуйлатыше Юрий Зайцев регионышто сезонный чер-влакын шарлымышт жапыште кучылтмо профилактике шотан мере-влак шотышто тыге каласен:
– Республикын кучемже ден Роспотребнадзорын регионысо виктемже Марий Элысе эпидемиологический ситуацийым эскеренак шогат. Поснак кугу тӱткыш калыкын диспансеризацийжылан, профилактике шотан тӱрлӧ мероприятийым эртарымылан ойыралтеш. Шыжым пӱсӧ респираторный вирусан чер да грипп дене черланен кертме лӱдыкшӧ кугемеш, сандене регионыштына нунын деч прививкым тылзе ончычак ышташ тӱҥалме. Ончыланна ончыкыжымат чылажымат жап деч ончыч ышташ тӱҥалаш да тидын дене калыкын илышыж ден тазалыкшым арален кодаш задачым шындена.
Прививкын кӱлешлыкше нерген Россий президентын Юл кундем федерал округышто полномочный представительже Игорь Комароват ойлен.
– Юл кундемысе регион-влак санкций жапыштат йот элла дене кылым кучат. Мемнан дене тӱнямбал кӱкшытан мероприятий, бизнес-миссий-шамыч эртат, сандене пошкудо элласе чыла эпидситуаций санитарно-эпидемиологический службо-влак деч пеҥгыде тӱткышым да иктаж черын ылыж кертмыжлан ямде лияш кӱлмым йодеш, – палемден тудо.
Россий президент Владимир Путинын кӱштымыж почеш илышыш пурталтше «Санитарный щит страны – безопасность для здоровья» федерал проектын кышкарыштыже элыштына патоген-влакым мониторитлаш кызытсе жаплан келшыше сетьым – 113 лабораторий ден 153 ПЦР рӱдерым, куснылшо 71 лабораторийым (ты чот гыч латкудытшо Юл кундем федерал округышто верланен) – ыштыме.
Маргарита ИВАНОВА
Роспотребнадзорын Марий Элысе виктемжын фотожо
