«МАРИЙ ЭЛ» ТАЧЕ

Илыме верым чоҥынет гын…

Марий Элыште илыме верым чоҥаш келшыше 51 участке уло.

Тидын нерген Росреестрын республикысе виктемже увертарен. «Илыме вер да оласе среда» национальный проект кышкарыште ты ведомство регионысо кучемын органже-влак дене пырля илыме верым чоҥаш келшыше кумдыкла дене пайдаланыме пашам шке контрольыштыжо куча, анализым эртара. Марий Элыште эре пашам ыштыше посна оперативный штаб уло. Тудо лач ты але вес мланде участкым оборотыш налме шотышто пунчалым луктеш.  Тидын деч вара участке нерген сведений Публичный кадастр картыш вераҥдалтеш. Росреестрын Марий Элысе виктемыжым вуйлатыше Вячеслав Волковын ойлымыж почеш, тачысе кечылан 51 тыгай участке уло, нунын кугытшо 177,6 гектарыш шуэш. Чоҥаш келшыше кумдык-влак Йошкар-Олаште, Козьмодемьянскыште, Медведево, Волжский, Марий-Турек, Курыкмарий ден Звенигново районлаште  улыт. Тылеч посна 6 мланде участкым оборотыш налме, нуным собственностьыш але арендыш пуымо. Кумытшым шуко пачашан пӧртым чоҥаш ойырымо, а кумытшым – посна илыме верлан.

Росреестрын Марий Элысе виктемжын увертарымыж почеш, чоҥаш келшыше участке-влак нерген уверым потенциальный инвестор-шамычлан муаш куштылгырак лийже манын, Публичный кадастр картын сайтышкыже пурыман. «Участки» разделыште «Жилищное строительство» строкам ойырен налман. Вара пискыште регионын номержым да пробел деч посна кок точкым да звездочкым шындыман (12:*). Лаштыкыште илыме верым чоҥаш лийше яра мланде участке улмо да нунын нерген тӱрыс увер лектеш.

 С.Носова

 

Опубликовать в Одноклассники

Добавить комментарий