«МАРИЙ ЭЛ» ТАЧЕ

«Марий Элым» шергалше пиалан ава, кова

«Марий Эл» газетлан возалтше-влак коклаште эртарыме лотерейыште  Медведево район Пиасир ял гыч Александра Ефимоваланат пиал шыргыжалын. Тудо пырдыж шагатым модын налын.

Александра Михайловна шочмо йылмына дене савыкталтше газетлан 1984 ий годсек подпискым ышта да тудым кушкыжмо, кугарня еда чон вургыж вуча.

Тӱҥалтыш гыч мучаш марте кажне лаштыкым шергалын лектам. Тӱрлӧ амаллан кӧра ом шукто гын, газетым поген пыштем. Мыланем колхоз илыш, артист-влак нерген, тӱрлӧ очеркым лудаш поснак чот келша, – ойла А.Ефимова. – Адакшым шочмо Морко кундемыштем мо ышталтме нерген куанен лудам. Иктаж-мо ситыдымыла чучеш гын, библиотекыш каен, вес марий изданий-влакымат шергалам.

А.Ефимова Муканай ялеш шочын-кушкын. Унчо школышто 8-ше классым тунем лекмекыже Йошкар-Олашке пашам ышташ толын. Икмыняр тыршымеке, уэш ялыш пӧртылын да «Передовик» колхозышто дояркылан ыштен. Ушкалым лӱштымаште эреак ончыл радамыште лийын. А вет тунам чыланат кид дене лӱштеныт.

Кечылан кум гана шупшылына ыле, – шарналта ӱдырамаш.

Туштак А.Ефимова Унчо рвезе, Леонид, дене палыме лийын. Икмыняр жап гыч ӱдыр-каче сӱаным ыштеныт. Тиддеч вара самырык еш Волгоград областьысе Октябрьский районыш илаш кусненыт.

Латик ий тушто иленна. Йочасад, школ укелан кӧра 1983 ийыште Марий кундемыш пӧртылынна, – ойла мемнан лудшына. – Пиасирыште верысе колхоз мыланна вик пӧртым пуэн. Пелашем дене коктынат колхозышто пашам ыштенна. Мый шала пашаш коштынам гын, Леонид трактор дене кудалыштын.  

Екатерина Михайловна пелашыж дене коктын лу икшывылан (индеш эрге да ик ӱдыр) ош тӱням пӧлекленыт. Кызыт чыланат ешан улыт.

Чаманаш кодеш, пелашем 25 ий ончыч мемнам коден кайыш. Тунам эн изи эргына улыжат ныл тылзаш лийын, – кумылжо тодылалте А.Ефимован.

Лу икшывым ончен-кушташ, пукшен-йӱкташ да йол ӱмбаке шогалташ – манаш веле! Марий ӱдырамашлан мом гына чытен лекташыже, кузе гына тыршаш логалын огыл!? Чолга ӱдырамаш ончычат вӱта тич вольыкым ончен да кызытат ушкалым, казам да сурт кайыкым куча.  

А.Ефимова сулен налме канышыш лекмешкыже колхозышто, а вара почтальонкылан, йочасадыште ороллан ыштен. Яра жапыште пиалан кова кидпашам ышташ йӧрата. Носким, пижергым тӱрлӧ тӱсан шӱртӧ дене тӱрлӧ узорым келыштарен пидеш. Южгунамже нуным палымыже-влаклан ужалаш колта. Шочмо Унчо кундемышкыжат миен толаш жапым муэш.

Пашам ыштет гын веле ялыште илаш лиеш, – воштылеш 21 уныкан да ик кугезе уныкан кова. – Юмылан тау, пеленем илыше эрге-шешкым, уныкам-влак сурт сомылкам ышташ полшат.

2019 ийыште Россий предприниматель Игорь Рыбаков Йошкар-Олан шочмо кечыже вашеш «Йошкар-Олан эн виян ешыже» конкурсым увертарен. Тушко Ефимовмыт ешат ушнен да тӱҥ призын озаже лийын. Миллиардер пиалан ава- ковалан 200 тӱжем теҥгеаш сертификатым кучыктен.  

 

Алевтина БАЙКОВА

Авторын фотожо

Опубликовать в Одноклассники

Добавить комментарий