25-27 июльышто Кукмор район Сэҥер (Синерь) ялыште Татарстан Республикысе самырык-влакын «Йӱлам арале» икымше слётышт лийын.
Тудым Татарстанысе марий-влакын калыкле-тӱвыра автономийышт, тӱрлӧ калык-влакын молодёжь ассамблейышт да «Ший эҥер» тӱвыра рӱдер» АНО республикын Раисше пелен Татарстаныште татар да шочмо йылме-влакым арален да вияҥден толмо шотышто комиссийын полшымыж дене эртареныт. А тидлан лӱмын грант проект возалтын.
Кум кечылан республикын ик эн чолга марий ӱдыр-рвезыже-влакым Сеҥер ял этно-тоштер комплекс вашлийын. Мероприятийым торжественно почмо годым слёт участник-влак шке ямдылыме номерыштым ончыктеныт, уна-влакымат пырля мураш-кушташ савырен кертыныт.
Слёт почмашке Татарстан Республикын Раисшын департаментшын Национальный политикым илышыш шыҥдарен толмо шотышто управленийже, Татарстан кундемысе калык-влак Ассамблейын еҥже-влак, тыгак Марий Эл гыч лӱмлӧ уна-влак саламлаш миеныт. Марий самырык тукым слётым эн ончыч Марий Элыште эртараш тӱҥалме. Ынде тудым марий-влакын тӱшкан илыме вес регионлаштат эртарымылан куаныман веле. Шукерте огыл тыгаяк слёт Одо кундемыште лийын. А тидлан негызым тунам эше Мер Каҥаш вуйлатыше Лариса Яковлева ыштен. Татарстаныште эртыше слётыш кызыт ынде Российысе марий-влакын калыкле-тӱвыра автономийыштым вуйлатыше, Марий Эл Кугыжаныш Погынын депутатше Л.Яковлева, ты органзацийынак исполкомжым вуйлатыше, Кугыжаныш Погынын депутатше Н.Пушкина, оньыжа Э.Александров миеныт. Тыгак Российысе марий-влакын автономийыштым вуйлатышын алмаштышыже О.Третьяков, Татарстанысе марий-влакын калыкле-тӱвыра автономийыштым вуйлатыше Н.Кукушкина, Озаҥ марий-влакын ончылъеҥже Л.Мусихина, Кукмор районысо марий-влакын автономийыштым вуйлатыше И.Родыгина, «Ший эҥер» АНО вуйлатыше О.Санникова да молат лийыныт. Нуно слётым пайдалын эртараш сугыньленыт, марий калыкын тӱвыражым, йӱлажым да чон поянлыкшым арален кодымаште самырык тукымын эн тӱҥ рольжым палемденыт.
Таклан огыл слёт «Йӱлам арале» маналтын. Тудын тӱҥ шонымашыжак тыгай лийын: марий ӱдыр- рвезе-влак коклаште кылым пеҥгыдемдаш, икте-весым паша опытышт дене палдараш да нуным марий калыкын йӱлажым арален кодымо пашам вияҥдаш кумылаҥдаш.
Слётын участникше-влаклан поян программе ямдылалтын: тӱрлӧ мастер- класс, лекций, тоштер мучко экскурсий, проект пашалан туныктымаш, ятыр лӱмлӧ, сеҥымашке шушо еҥ дене вашлиймаш. Икымше кечынжак «Йыргешке ӱстел» йыр мутланымаш эртен. Тушко кугыжаныш кучем, мер организаций-влакын еҥышт дене вашлиймаш, тыгак калык кочкышым ыштыме шотышто мастер-класс эртеныт.
Кокымшо, кумшо кече-шамыч социальный проектым возаш туныктымо тренинг программылан пӧлеклалтыныт. Тушто деловой да интеллектуальный модыш-влак эртеныт. Соцкыл лаштыклаште кузе чолгарак лияш, марий йылме дене текст-влакым возаш туныктеныт. Татарстанысе марий мер толкын, калыкле-тӱвыра автономий-влакын пашашт, «Марий шонанпыл» йоча этнокультурный фестиваль нерген мутланеныт. Марий Эл радион редакторжо, мурызо, журналист Владимир Матвеев дене вашлиймашат чылаштлан келшен.
Мероприятийыш Татарстанын Раисшын департаментшын, Калык-влакын ассамблейыштын еҥже-влакын толмымат марий-влакым пагалымышт семын ончыктыман. Нунат слётын сай кӱкшытыштӧ эртымыжым палемденыт.
С.Носова
Снимкыште: слёт годым.
Фотом Татарстанысе марий-влакын калыкле-тӱвыра автономийыштын соцкыл лашткыше гыч налме.
