Поро пашан апшатше деч 100 коҥга
Шукерте огыл Пошкырт кундем Мишкан район Кугу Соказа ялыште шке пашам ворандарыше марий предприниматель, апшат, чолга мер еҥ Вячеслав Сабиров нерген газетыштына материалым савыктенна ыле. Ты ура чонан еҥ нерген сералташ эше вес амал лектын. Тудо СВО-што улшо военнослужащий-шамычлан кочкаш шолташ, мончаш пураш келшен толшо, шке технологийже почеш таптыме коҥга-влакым колта.
Вячеслав Сабиров кужу жап сварщиклан ыштен. Вара шкенжын апшаткудыжым почын. Ты паша шуко вийым налеш гынат, тыгак мер пашаштат чолгалыкым ончыкта. Районысо депутат-влак погынымашын еҥже религиозный комиссийым вуйлата, Бирск ола ден Бирск районысо марий-влакын автономийыштым вуйлатышын алмаштышыже.
Шукерте огыл тудын нерген шке Телеграмм-каналыштыже Башкортостанын вуйлатышыже Радий Хабироват серен:
– Вячеслав Сабиров дене мый Бирскыште палыме лийым. Тудо апшат, акрет ремеслом вияҥден толеш. А эше шке кидше дене ойыртемалтше коҥга-шамычым ышта да нуным СВО-ш салтак-влаклан колта. Коҥгам ыштыме технологийжым шкак шонен муын. Коҥгаже ырыктат, тушто кочкаш шолташат йӧнан да эше пеш кӱчык жапыште тудым монча коҥгашкат савыраш лиеш. Мо оҥайже, нимогай шикш ок лек. Передовойышто улшо рвезе-влакланат моткоч келша. Кидмастар СВО-шко 100 наре тыгай коҥгам колтен! Кугу тау Вячеслав Александровичлан салтак-шамыч дечат, мый дечемат!
Эшежым Вячеслав Сабировын ойлымыж почеш, кажне коҥгашкыже марий тамгам келыштарыме да кажныжым марий юмыйӱла почеш юмылтымо. Тыгай еҥым кузе от мокто!
Мишкан районышто марий-влакын акрет годсек кумалме верышт уло, Султан керемет маналтеш. Вячеслав тудым таптыме савар дене авырен налын, капкам, марий тамган кӱварымат келыштарен. Но геройна марий-шамычлан веле огыл, тыгак черке ден мечетьланат полша. Сабиров шкеже ятыр ий Бирскыште ила, 55 ияш пӧръеҥ шочмо вержым, калыкшым огеш мондо, кертмыж семын полшенак шога.
С. Носова
Фотом Р.Хабировын официал Телеграмм-каналже гыч налме
