Марий Эл вуйлатыше должностьыш икымше кандидат – Юрий Зайцев.
Марий Эл вуйлатышын пашажым жаплан шуктышо Юрий Зайцев 12 июньышто республикын Рӱдӧ сайлымаш комиссийышкыже документым пуэн. Сайлымашке тудо самовыдвиженец семын ушнаш шона.
– Мый пашам ышташ, пайдам кондаш, да, мутат уке, республик, тыште илыше-влак дене пырля ончыко каяш шонем. Самовыдвиженец семын лекмемат мый шкешотан палылан шотлем. Молан манаш гын, тиде случайыште мый еҥ-шамычым могай партийыште да могай идеологиян улмо шотышто ом шеледе. Ме чыланат ик шонымаш дене ушалтынна, шонем – тиде кумда элнан вий-куатше да еҥ-шамычын илышыштым саемдымаш. Мо мемнан республик дене кылдалтеш – мылам эн тӱҥ да кӱлешан, – палемден Юрий Зайцев.
Марий Эл ЦИК-ын пашаче группыжо республик вуйлатышын пашажым жаплан шуктышо деч документ-влакым налын, тидым пеҥгыдемдыше справкым пуэн, тыгак Юрий Зайцевлан тудым поддержатлыме нерген муниципал образований-влакын представительный органышт-влакын депутатышт да избиратель-шамыч деч кидпалым погаш кӱлмӧ нерген ойленыт.
Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен.
