Ик жаплан – кокла курымыш
Йошкар-Олаште регион-влак кокласе «Наследие – 2025» историй реконструкций фестиваль эртен. Тушко куд регион, 10 ола гыч реконструктор-шамыч толыныт. Нуно Российысе ожнысо сар вургем ден йӱлам ончыктеныт.
Чарла кремльыште эртыше фестивальыште кокла курымыш логалмыла чучын. Тушко мийыше-шамыч патыр-влакын кучедалмыштым шке шинчашт дене ужыныт, тыгак пикш гыч лӱйкалаш, изирак товарым кышкен ончаш йӧн лийын. Тылеч посна мастар-влак ярмингаште шуко сатум темленыт. Мутлан, сӧрастарышым, кӱмыж-совлам, кӱртньӧ, пу, моло пӱртӱс материал гыч ыштыме тӱрлӧ ӱзгарым.
Фестивальым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов, Марий Эл вуйлатышын советникше, Российысе военно-исторический обществын регионысо пӧлкажым вуйлатыше Евгений Кузьмин, Йошкар-Ола мэрын пашажым жаплан шуктышо Антон Трудинов, ветеран-влакын «Боевое братство» всероссийский мер организацийын Марий Элысе пӧлкажым вуйлатыше Владимир Белоусов почыныт. Евгений Кузьмин Россий военно-исторического обществын членский билетшым Антон Трудиновлан кучыктен.
Мероприятий Владимир Мединскийын вуйлатыме Россий военно-исторический обществын полшымыж дене эртаралтеш. Регион-влак кокласе кӱкшытан фестиваль Йошкар-Олаште 2023 ийыште икымше гана лийын. Но тыгай мероприятий дене «Волжский Путь» клуб 2009 ийыштак калыкым палымым ыштен. Варажым Йошкар-Олаште тудо икмыняр гана эртен. Ты клубым ПГТУ пелен чумыреныт. Таче кечылан рӱдолаштына военно-исторический реконструкций клуб икмыняр уло. Мо оҥайже, ӱдыр-шамычат ты сомыллан шӱмаҥыт. Теве Казаньысе «Варяг» клуб гыч Гузель Айдемирова кучедалмаште рвезе-влакымат ятыр гана сеҥен.
Реконструкций паша шуко шийвундым йодеш. Российын тӱрлӧ кундемыштыже эртаралтше тыгай таҥасымаш-влаклан полышым кугыжаныш ойыра.
Йошкар-Оласе фестивальыште икмыняр реконструктор дене лишкырак палыме лийынна. Москвасе «Байард» клуб гыч Викентий Загородниковлан рӱдолана моткоч келшен. Тудо утларакшым фехтований дене заниматла. Тиде сомыллан 2018 ийыште шӱмаҥын.
Таҥасымаш-влак ойыртемалтшын эртеныт. Рыцарь-шамыч умдым кышкеныт, пикш гыч лӱйкаленыт, рыцарь-влакын латыштым чиен кучедалыныт. Акрет жапысе руш-воин-влакын вургемышт тӱҥ шотышто меж гыч пидме лийыныт. Кемым коваште гыч ургеныт. Боец-влак нӱшкӧ щит, клубын символикыжым сӱретлыман керде дене пайдаланеныт. Судья-шамыч бой-влакын эртымыштым, воин-влакын чийымыштым да саргурал дене пайдаланымыштым тӱткын эскереныт. Икманаш, фестиваль ойыртемалтшын эртен. Тушко мийыше шкаланже тушто шуко ум муын, кӱлеш пайдам налын кертын.
Михаил Скобелевын фотожо.
Снимкылаште: Чуваший гыч реконструктор-влак.
