Марий кугыжаныш университетыште Кугу Отечественный сарыште Сеҥымашлан 80 ий теммылан пӧлеклалтше «Чылажат Сеҥымаш верч! МарГУ: тукым-влак кокласе кыл» тӱнямбал кӱкшытан II форум лийын.
Мероприятий Россий президент Владимир Путинын тӱҥалтышыж почеш «Без срока давности» научно-просветительский проект дене келшышын эртаралтеш. Тӱҥ шонымашыже – историйым чын ончыкташ, самырык тукымым патриотизм шӱлышеш ончен кушташ виктаралтын.
Марий Элым вуйлатыше Юрий Зайцевын кӱштымашыже почеш участник-влаклан сай паша лектышым республик правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов тыланен ойлен. Форумышто Федераций Совет председательын алмаштышыже, Марий Эл деч сенатор Константин Косачёв, тыгак специальный военный операцийын участникше, Российын Геройжо Анатолий Иванов, политике да мер деятель, историй областьыште эксперт да студент-влак лийыныт.
Участник-шамыч тематический секцийлаште пашам ыштеныт, тидын деч посна нунылан мастер-класс-влакым (окоплык сортам ямдылыме, маскировко сетьым пидме да тактический медицине дене) эртареныт.
«Знание» Россий обществын проектше почеш форумышто специальный военный операцийын участникше дене «Иктӧр вашмутланымаш» вашлиймаш лийын. Тыгак «Без срока давности» баннер, СВО-н участникше Алексей Вальманын « Молодая Гвардиян» мландыштыже» фото, Марий Элын сулло художникше Андрей Санниковын графике да патриотизм шӱлышан плакатше-влак ончер-шамыч дене палыме лияш йӧн ышталтын. А «Вузын пырдыжше гыч кредалмаш пасу марте: героизм да Сеҥымаш верч надыр» экспозиций нерген посна палемдыман. Тушто – Кугу Отечественный сар жапыште Марий Элын икымше вузшын историйже ончыкталтын.
Марий Эл вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
