Марий Эл Кугыжаныш архивыште «Мумия» документальный фильмым ончыктеныт.
Мероприятийым Йошкар-Ола епархий ден Тӱнямбал руш калык соборын Марий Элысе пӧлкаже организоватленыт.
Фильмым Москон да Чумыр Российын эн святой патриархше Кириллын суапландарымыж почеш «Спас» телеканал войзен.
Киносӱрет В.И.Ленинын Йошкар площадьыште верланыше мавзолейжылан да тӱнямбал цивилизацийыште тӱвыра феномен семын аклалтше тыгаяк шотан моло сооруженийлан пӧлеклалтын. Фильм нуным чоҥымо историй да мавзолейын айдеме тукымышто посна верым налын толмо корныж дене веле огыл палдара, тыгак нине объектлашке шыҥдарыме духовный, вес тӱня дене кылдалтше да шояк религийым почын ончыктышо аспект-шамычым радамла. Поснак кугу тӱткыш сооружений-шамычын мумификаций да кумдан палыме малтыме вер-влакын (усыпальнице), ты шотыштак египет пирамиде ден месопотам зиккурат-шамычын, кугезе йӱлашт кокласе кыллан ойыралтын. Документальный киношко архив кадр, специалист дене интервью, совет мемориалын символ шотан кӱлешлыкше нерген шонымаш-влакым пуртымо. В.И.Ленинын мумийыш савырныше капшым, мавзолей гыч луктын, мландыш тояш темлымашланат кугу ужашым ойырымо.
Мероприятийыште Тӱнямбал руш калык соборын Марий Элысе пӧлкажын йыжыҥъеҥже, Йошкар-Ола епархийын черкылаштыже служитлыше священник-влак да мер калык лийыныт.
Кином ончымо деч вара Йошкар-Ола епархийын Черке специалист-влакым ямдылыме рӱдержын директоржо, историй науко кандидат Олег Левенштейн ден Святой-шамычын канонизацийышт шотышто комиссийын вуйлатышыже Михаил Ильин фильм шотышто шке шонымашыштым ойленыт. Нуно киносӱретын историй вел аспектше-влакым лончыленыт, йодыш-шамычланат вашештеныт.
Тылеч вара залыште изирак ӱчашымаш ылыжын: мероприятийыш толшо-влак фильмыште нӧлталме темым эртыше илыш гыч кондымо тӱрлӧ факт дене пеҥгыдемден лончыленыт. Шке шонымашыштым, южо татыште икте-весыштлан йӧршын келшен толдымым да ваштарешла шогышым, КПРФ-ын регионысо фракцийжын еҥже-влак, Йошкар-Ола епархийын иерейже Димитрий Дьяков, Марий Эл Кугыжаныш архивын директоржо Александр Одинцов, Марий Эл вуйлатышын советникше Анатолий Смирнов да моло луктын ойленыт. Но мучаште чыланат ик ойышко шуыныт: таче элнан чын историйжым арален кодаш, эртышым шемемдыде, келшыше иктешлымашым ыштен, ончыко каяш кӱлеш. Да, мутат уке, – кушкын толшо тукымым шочмо элым йӧратыме шӱлышеш воспитатлаш, россий калыкын икоян улмыж ден яндарлыкшым арален кодаш.
Маргарита Иванова.
Йошкар-Ола епархийын фотожо.
