ИСТОРИЙ УВЕР ЙОГЫН

Шотлаш тӱҥалыт, но вес шошым

Тений 1 октябрь гыч 31 октябрь марте Российыште 12-шо гана калык чотым шотлен лукшаш улыт ыле. Эшежым тений перепись цифр йӧн дене икымыше гана эртараш палемдалтын. А тидлан переписчик-влаклан лӱмын электрон планшет-влакым налын ямдыленыт. Вара чыла данный переписьын виктемышкыже чумыралтшаш улмаш. Чылаже 360 переписчикым ямдыленыт.

Но коронавирус эпидемий тидлан чаракым ыштыш. РФ Правительствын пунчалже дене келшышын, черетан Всероссийский переписьым тений огыл, а 2021 ий апрельыште эртараш палемдыме.

Перпись вес ийын 1 апрель гыч 30 апрель марте шуйнаш тӱҥалеш. А элнан нелын миен шуаш лийме кундемлаштыже тудо тений октябрь гыч вес ийысе июнь марте лиеш. Переписьын данныйжым вес ийын октябрьыште иктешлат. А тӱрыс иктешлыме пашам 2022 ий IV кварталыште мучашлаш палемдыме.

Молан перепись кӱлеш? Тудым чыла цивилизованный эллаште эртарат. Тений тудо 50 утла элыште лийшаш улмаш. Перепись ончыкылан элым вуйлаташ негызым ышташ полша. Еҥ, еш, сурт озанлык, национальность, йылме чот, калыкын шинчымаш кӱкшытшӧ, миграций могай да моло йодыш шотыштат рашлык лектеш. Российысе обществын тӱрыс сӱретше почылтеш манашат лиеш. Кучемын чыла кӱкшытыштыжӧ пайдале пунчал-влакым лукташ йӧным пуышо кугыжаныш статистикым раш пален налына. Каласен кодыман, тачысе кечылан Российыште 146 миллион еҥ ила, 55 миллион суртозанык уло. Переписьыш шке пачер але сурт да гражданстве деч посна илыше-шамычымат ушаш тӱҥалыт. Шушаш переписьыш ушнаш эшеат куштылгырак лиеш. Тидым переписчик дене веле огыл вашлийын, «Госуслуги» порталыште, тыгак тыланда йӧнан жапыште переписной участкыш миен ышташ лиеш. Но тидын марте эше 7 тылзе утла жап уло.

С.НОСОВА

Опубликовать в Одноклассники

Добавить комментарий