«Ик ой дене илена»
Октябрь мучаште У Торъял район Токтарсола ялыш мийымына годым Земфира Васильевна ден Евгений Викторович Небогатиковмыт деке унала пурышна. Нуным ты кундемыште пеш сайын палат да пагалат. Коктынат туныктышо улыт. Марийже образований аланыште 16 ий пашам ыштен гын, пелашыже ты сомыллан 33 ийым пӧлеклен. А Евгений Викторовичше У Торъял районысо муниципал образованийым ятыр ий вуйлата.
Небогатиковмытын пӧртышт «Урал» колхозын мӱкшотар олмыштыжо шинчен, вара жап эртыме семын весым чоҥеныт. Сурт сылне верыште шинча: йырым-йыр – чодыра, куэр. Воктенак, изи корем пундашыште, памаш йоген лектеш. Евгений Викторович дене пырля памаш вӱдым тамлышна, вара олыкым ончен лекна. Суртоза вӱтам, шке мастерскойжым ончыктыш.
Каныш годым Евгений Небогатиков окнасергам, моло сурт сомылым ышта. Теве пече меҥгымат, йӱр ынже нӧртӧ манын, изи шатровый леведыш дене петырен. Суртозан чыла пашалан келшен толшо тӱрлӧ инструментше уло.
– Ончыч тиде верыште ик сурт-оралте лийын гын, варажым весым чоҥенна. Кызытат сомыл ятыр. Мончам, беседке-влакым тӧрлыман. Чоҥымо годым тачысе илышлан келшен толшо материалым кучылтам. Леведышым профнастил дене леведынна. Пече меҥгым нарынче тӱсан кермыч гыч оптымо, а печыжым таптыме кӱртньӧ гыч ыштенна, – мане Евгений Викторович.
Небогатиковмытын кок пӧрт ончылнышт палисадник уло. Коеш, ты ешыште ӱдырамаш-шамыч пеледышым йӧратат, молан манаш гын мийымына годым тушто роза моторын пеледалт шоген.
Суртозан оралтым шот-рат дене кучымыжо шуко вере палдырна. Теве мончам, монча ончылым ик кугу леваш йымаке пуртымыжо шкешотан. Тидыже куэ пум, выньыкым аралаш чыла шотыштат келшен толеш. Тыгак суртоза –шкешотан кулинар. Куэ вӱд гыч ямдылыме йӱышыжӧ моткочак ойыртемалтше. Ты напиткылан куэ вӱдым тудо шошым кажне кечын пога, вӱдшӧ писын ынже шопо манын, апельсиным, сакырым ешара да шолта.
Евгений Викторовичын аваже Нина Ивановна, Володя эргышт пеленышт илат. Володя ден Лиана пелашыже ныл йочам ончен куштат.
– Пелашем Земфира Васильевна дене 35 ий утла икте-весе дене каҥашен, ик ой дене, ваш-ваш умылен илена. Чыла сомылым ик кугу ешна дене пырля ыштена. Мутлан, шудым тӱшкан ямдылена. Ушкалым, сӧснам, сурткайыкым ончена, – мане Евгений Небогатиков.
Теве тыге Небогатиковмыт Токтарсолаште пӱртӱсым йӧратен илат, йочам, уныкам куштат, марий улмышт дене кугешнат.
Михаил СКОБЕЛЕВ,
Лидия ШАБДАРОВА
Михаил Скобелевын фотожо
