Морко район Зеленогорский посёлко кидмастар-влаклан поян, нунын кокла гыч иктыже – пу совлам ышыше Николай Григорьевич Павлов.
– Мый Морко район Весшӱргӧ ялеш шочын кушкынам. Марий радиомеханический техникумым тунем пытарымеке, Зеленогорский леспромхозышто электриклан ыштенам, вара – сулен налме каныш марте инженер-электриклан, а икмыняр жап заправщик лийынам, – каласыш туд– Шке жапыштыже Зеленогорск чодыра озанлыкын сувенир цехше ыле. Ондакшым тушто точитлыме ате-шамычым, матрёшкым веле ыштеныт гын, варажым хохлома роспись почеш сувенирым ямдылаш тӱҥалыныт. Сату шукырак лийже манын, Угарман кундем гыч совла заготовкым конденыт. Сувенир цехыште пашам ыштыше-влак тудым шлифоватленыт, грунтоватленыт да хохлома роспись почеш чиялтен сылнештареныт. Тиде паша мылам оҥайла чучын, сандене ты сомыллан тунемым. Но перестройко жапыште чылажат пытыш.
Сулен налме канышыш лекмеке, Николай Григорьевич совлам ыштымым умбакыже шуен, заготовкымат шкак ямдылен. Эн ончычак пуым налын, тӱҥ шотышто куэм, пистым, нӧлпым, шопкем кучылтын.
– Нуным пӱчкедаш куштылго. А шопкеже кошкен шуэшат, пудамат пудален от керт, тугай пеҥгыде лиеш, – ойла кидмастар.
«Совлам ыштен моштышо тунемшыда-влак улыт мо?» йодышемлан Николай Григорьевич вашештыш:
– Уке. Ончыч школышкат, тӱрлӧ фестивальыш ӱжыт ыле. Кызыт ынде пу совлам сувенир семын гына кучылтыт. Ончыч тудын дене кочкышым ыштымаште пайдаланеныт гын, кызыт, мутлан, пелашем вареньым шолтымыж годым гына кучылтеш. А вет, шарналташ гын, марий калык унам шоваш, корка аралыш да мӱй пуракорка дене вашлийын.
Николай Григорьевич совлам кызытат ышта. Ӱшаныме шуэш: тудын деч самырык тукым ты сомыллан тунемеш гын, тиде мастарлык ик тукым гыч весыш кусна.
М.СКОБЕЛЕВ
Авторын фотожо
