Марий Эл вуйлатыше Юрий Зайцев республикысе политический партий-влакын еҥышт дене вашлийын, а тиде «Единый Россий», ЛДПР – Российын либерально-демократический партийже, «Новые люди», «Российысе коммунист-влакын коммунист партийышт», «Российысе пенсионер-влакын социальный справедливость верч партийышт» да «Россий Федерацийын коммунист партийже» лийыныт.
Юрий Зайцев шукерте огыл Марий Элын Кугыжаныш Погынышкыжо да верысе кучем органлашке депутат-влакым сайлымашым республикын политический илышыштыже пеш кӱлешан этапше семын палемден.
«Кундемыштына илыше-влак шке граждан долгыштым шуктымашке да республикнан ончыкылык пӱрымашыжым чоҥымашке кумылын ушненыт. Таче тыште регионысо партий-влакын еҥышт чумыргеныт. Мый чыланнам республикын пайдажлан пашам ыштыше ик кугу командылан шотлем. Иктым мондыман огыл, кажныж почеш Марий Элыште илыше да мыланна ӱшаным ыштыше еҥ-влак шогат. Кандидат-влак тӱрлӧ шонымашан лийын кертыт гынат, тӱҥ цельна икте лийшаш – республиклан тӱзланаш да тыште илыше калыклан илышыжым ворандараш полшаш. Ме элнан изи ужашыже гына улына, но лач тыгай ужаш гычак тудо шога», – каласен тудо.
Регион вуйлатыше палемден: Марий Эл правительстве, Кугыжаныш Погын ончыкыжымат Россий президент Владимир Путинын порученийжым шукташ, республикым социально-экономический велым вияҥдаш, калыкын илышыжым саемдаш, СВО-што улшо-влаклан да нунын ешыштлан чыла велымат полшаш тӱҥалыт.
Юрий Зайцев чыла тӱрлӧ партийный вий дене ушнен пашам ышташ ямде улмыжым палемден. Ик команде дене депутат корпусат, республикын правительствыжат, тӱрлӧ нелылыкым сеҥен, палемдыме цельышке шуын кертыт.
Марий Эл Республикым вуйлатышын пресс-службыжын уверже негызеш Светлана Носова ямдылен.
Д.Речкинын фотожо
