Куяр лесничествыште «Шарнымаш садым» шынденыт.
Эколого-патриотический акцийыш Марий Эл вуйлатыше Юрий Зайцев ушнен.
«Тӱнямбал акцийыш ушнымаш республикыште сарыште кредалше талешке-влакым шарныме нерген ойла. Шындыме пушеҥге-влак – тиде кундемнам ужартымаш веле огыл, тиде ончыкылык тукымлан лӱддымылык символым – илыше памятникым – ыштымаш. Мемнан сарзе-влакын тыныс илышна верч подвигышт нерген эре шарнышаш улына», – палемден Юрий Зайцев.
«Шарнымаш сад» акций Россий президентын темлымыж почеш эртаралтеш. Марий Элыште тудо кудымшо гана эрта. Тиде жапыште 1 миллион наре пушеҥгым шындыме. Тений гына 500 озымым шындат, тышеч 300 пӱнчым Йошкар-Ола деке лишке вераҥдат. Тӱҥ мероприятийже лачшымак Куяр лесничествыште эртен, 15 тӱжем озымым шындыме.
Акций Кугу Отечественный сарыште Сеҥымашлан 80 ий теммылан пӧлеклалтше ик эн тӱҥ мероприятий радамыш пурен.
Марий Эл вуйлатышын пресс-службыжын уверже негызеш Светлана Носова ямдылен.
