«МАРИЙ ЭЛ» ТАЧЕ

Марий олаште – Келшымаш пӧрт

17 майыште Йошкар-Олаште Калык-влакын келшымаш пӧртыштым торжественно почыныт.

Марий Элыште 50 утла тӱрлӧ калыкын представительже-влак илат, сандене тыгай Келшымаш пӧрт моткоч кӱлын, тидын нерген шукертак ойлалтын. Эшежым республикыште 32 национально-культурный мер ушем пашам ышта.

Оралтым чоҥымо пашам 2021 ийыште тӱҥалыныт. Кӱчык жапыште, манашат лиеш, тудым нӧлтен, тӱзатен шуктымо. Тӱрысшӧ тидлан 390 миллион теҥге федерал бюджет гыч ойыралтын. Тыгак эше 300 миллион теҥгем тудым  оборудований дене пойдараш колтеныт.

Келшымаш пӧртым торжественно почмаш кугу пайрем семын эртыш. Мероприятийыште Марий Эл вуйлатыше Юрий Зайцев, Федераций Советын председательжын алмаштышыже, Марий Эл Республикын исполнительный органже деч прдставитель Констатин Косачев, Марий Эл Кугыжаныш Погын председатель  Анатолий Смирнов, Марий Элыште Тӱҥ федеральный инспектор Павел Волков да молат  лийыныт.

«Келшымаш пӧрт – тиде республикыште да  элыштына илыше калык-влакын икоян улмо символышт. Калык-влакын келшен илымышт, икоян улмышт мемнан кугыжанышнам утларак вияным ыштат. А тиде пӧрт нунын кокласе кылым утларак пеҥгыдемдаш, элнам ончыко наҥгаяш полшаш тӱҥалеш», – каласен Юрий Зайцев.

 Регион вуйлатыше РФ правительстве председатель Михаил Мишустинланат тауштен. Вет лач тудо ты Келшымаш пӧртым чоҥаш кӱлмӧ  шотышто пунчалым луктын. Тиде 6 ий ончыч лийын.  Йошкар-Олаште калык-влак кокласе кыл шотышто советын заседанийже эртен. Тудым Российын Президентше шке эртарен. Заседаний толшо уна-шамычлан шарнымашеш кодын. Келшымаш пӧртым чоҥаш  тунам регионын йӧнжат, шийвундыжат лийын огыл. Туштак республиклан тыгай объектын кӱлмыж нерген йодыш тарваталтын. Тиде пагытым Константин Косачеват саламлымыж годым шарналтыш.

Юрий Зайцев объектым нӧлтышӧ-влакланат тауштен. А ты пашалан «Казанский посад» ООО вуйын шоген. Тудын пашаеҥже-шамычлан Тауштымшан серышым кучыктен.

Торжественный мероприятий деч вара чыланат Йошкар-Олан рӱдыжым сылнештарыше эше ик у оралте кӧргыш чылан пуреныт. Келшымаш пӧртыштӧ офис пӧлем, концерт, репетиций, концференц зал-влак келыштаралтыныт. Уна-влакым вашлияш мотор холл-фойе уло. Тӱрлӧ ончерым эртараш посна залым келыштарыме. Тыгак ончылгоч палемдыме почеш тыштак национальный кухньо кафе лийшаш. Регион вуйлатыше да уна-влак пӧлем-влакым ончен лектыныт, кокымшо пачашысе залыште вераҥдыме «Кугу Юл» ончерыште лийыныт.

Келшымаш пӧртым почмо деч вара кумшо пачашыште Финн-угор студент-влакын Х тӱнямбал форумышт почылтын.

С.Носова

М.Скобелевын фотожо

Опубликовать в Одноклассники

Добавить комментарий