24 августышто Медведево поселкын кечыже лийын. Тудлан тений 301 ий темын.
Ты кечынак тушто «Моя малая родина» калык усталык да виче-марий келшымаш XVI Регион-влак кокласе фестиваль-конкурс эртаралтын.
Тидым шотыш налын, поселкын кечыжым да фестивальым почмаште Медведево район вуйлатыше-влак веле огыл, тыгак Киров областьысе Санчурск район гыч уна-влак лийыныт.
Торжественный ужаш деч вара районысо художественный самодеятельность коллектив-влак концертым ончыктеныт. Районысо краеведений тоштер «Где эта улица, где этот дом» квестым эртарен. Кидмастар-влак шке пашашт дене палдареныт да налаш кумылан-влаклан темленыт. «Олимп» стадионышто тӱрлӧ спорт модмаш, куржталмаш, скандинав коштмаш дене таҥасымаш лийыныт. Каныме паркыште икшыве-влакым весела программе дене куандареныт. Тӱвыра да каныме рӱдер кумдыкышто аквагриммым да кукшо душым ышташ туныктымо мастарлык класс-влак эртаралтыныт. Кастене «Время пришло» рок-группын концертше лийын. А пелйӱд деч вара «Кино йӱд» акций дене келшышын икмыняр фильмым ончыктеныт.
«Моя малая родина» фестиваль-конкурсын участникше-влак мастарлыкыштым тӱвыра да каныме рӱдерын полатыштыже ончыктеныт. Тушко Марий Эл, Киров область, тыгак Чуваший гыч вокальный ансамбль ден посна мурызо-влак ушненыт.
Любовь Камалетдинова
