23 февральыште Морко район Шлань ялыште ече дене таҥасымаш эртен.
Тудо Шочмо элым аралышын кечыжлан пӧлеклалтын. Тушко республикнан икмыняр районжо да Татарстан Республик гыч 90 участник ушнен.
– Тенийысе ий – Россий президент Владимир Путинын увертарымыж почеш Россий калык-влакын икоян улмо идалык. Тачысе таҥасымашкат молгунамсе семынак тӱрлӧ калык ушнен, вет мемнан Унчо кундемыштынат марий, руш, татар-влак ик еш семын келшен да ваш полшен илена, – спорт пайремым почмаште палемден Марий Эл Кугыжаныш Погынын депутатше, «Передовик» ялозанлык артель вуйлатыше Юрий Игнатьев.
– Кандашымше гана эртаралтше таҥасымаш пелашем Елена Николаевна Петровам шарныме лӱмеш эрта. Тудо Унчо кундемынак шочшыжо, 15 ий да 9 тылзе погранвойскаште служитлен, – каласыш Морко район погынымашын депутатше, пограничник Альберт Петров.
Участник-влак, ийготышт дене келшышын, 1, 2,5 да 5 километрыш куржыныт. Нунын радамыште шым ийыш тошкалше ден шымле утла ияш-влакат лийыныт.
Вич километрым куржталше-влак коклаште абсолютный сеҥышыш Марат Соловьёв (Морко район Муналмаш ял) ден Снежана Петрова (Морко посёлко) лектыныт.
Ечыгорно дене изирак-шамычын толмыштым ончаш поснак оҥайын чучын: чевер чуриян, лумаҥше вургеман йоча-шамыч финишыш кыртмен вашкеныт.
Кугурак ийготан-влак кокла гыч Юрий Ясмурзинын (Вараҥыж ял гыч) сонарзын ечыж дене таҥасен толмыжо мыскарашкат савырныш. «Кушто мераҥет, Юрий чӱчӱ?» – икмыняр еҥ воштылалын йодо. Тудат ӧрын ыш шого, «Нуно мыйын почешем ялышкем шкак мият» – вашештышманын.
– Ече дене кажне кечын гаяк Йошкар-Ола воктенысе Новотроицк (кызыт тушто илем) чодыраште коштам: шканем лӱмынак ечыгорным ыштенам. Теве поранан, луман игечылан кӧра ынде кум арня ечыгорныш лектын омыл ыле. Шочмо кундемыште эртаралтше таҥасымашыш лӱмынак толынам, самырык жапемат шарналтышым. Школышто тунемме годым Ямбатыр гыч Унчыш ик гана веле огыл ече дене коштмо, – чонжым почо Унчо кундемын шочшыжо, 33 ий Казахстаныште илыше да шахтыште пашам ыштыше 72 ияш Вячеслав Ефремов.
– Таза илыш-йӱлам кучымо шот дене таҥасымашке тунемшем-влак: Артем Ефимов ден Дмитрий Данилов – дене пырля шкеат кумылын ушненам. Ух, игече мардежан, но ечыгорно пеш чапле. Рвезе-влакым спортлан изинекак шӱмаҥдыман. – каласыш Морко администрацийын тӱвыра, спорт да туризм пӧлкажым вуйлатышын алмаштышыже, боевой действийын ветеранже, «Герои Марий Эл. Талешке-влак» проектын участникше Руслан Панин.
Сеҥыше-влакым верысе клубышто саламленыт. Нунылан грамотым, медальым да таҥасымашын эмблемыж дене лӱмынак ямдылыме пӧлекым кучыктеныт. А сылне муро аршашым Марий Элын калык артистше Светлана Осипова-Шос ден Александр Веткин кучыктеныт.
Справке: Икымше гана таҥасымаш 2017 ийыште Россий погранвойскалан 100 ий темме лӱмеш эртен. Унчо кундемыште ты войскаште служитлыше-влак ятырын улыт. Таҥасымашлан тӱҥалтышым Иван Гаврилов ден Альберт Петров ыштеныт.
Алевтина БАЙКОВА
Авторын фотожо
