Республикыштына 16-22 мартыште Умшагӧргын тазалыкшым эскерыме арня палемдалтеш.
Умшагӧргын тазалыкше шкемшижмашын да илыш качествын ойыраш лийдыме ужашыштлан шотлалтеш. Таза пӱй ден пӱйшыл шот дене кочкаш, чаткан мутланаш, шкем ӱшанлын кучаш да системныйлан шотлалтше чер ваштареш кучедалаш полшат.
20 мартыште палемдалтше Умшагӧргӧ тазалыкын тӱнямбал кечыже умшагӧргым чарныде эскераш да пӱй дене кылдалтше ситыдымашым грамотно кораҥдаш кӱлмылан тӱткышым ойырымашке виктаралтын.
Профилактикын пайдаже: стоматологий дене кылдалтше шуко черым вияҥаш тӱҥалме йыжыҥыштак корштарыше процедур да кугу роскот деч посна эмлаш лиеш.
Технике:
- пӱйым кечеш кок гана кок минут дене эрыктыман, тыгодым щёткым йыр коштыктыман але пӱй пелен темдал кучыман, эмальым локтыл кертме деч шекланыман;
- пӱй шӱртӧ (флосс) але ирригатор дене пайдаланыман: пӱй коклаш погынышо лончым кораҥдаш кӱлеш, но, шкат паледа, тидым щётко дене ышташ огеш лий.
Пӱйым эрыктыме щётко ден пастым чын ойырен налме йӧн:
- щётко пушкыдо шуан лийже. Тудым кажне 3-4 тылзе гыч але черланыме деч вара вашталтыман;
- фторан (1450-2500 ррm) пасте пайдалырак. Тудо айдемын ийготшылан да стоматологын темлымашыжлан келшен толжо.
Кочкыш-йӱыш:
- сакырым, шопалге йӱышым да кӱэштме изделийым шагалемдыман;
- эмальым локтылаш огыл манын, келшыше жапыште да рационын кышкарыштыже кочман.
Стоматолог деке жапын-жапын кошташ гын, кариесым, пародонтозым да моло черым вияҥаш тӱҥалме йыжыҥыштак чарен шогалташ лиеш.
Профилактике дене кылдалтше темлымаш чылалан икгай огыл, тудо айдемын ийготшо, пӱйын состоянийже, брекетын але протезын, хронический черын улмышт дене кылдалтын.
Эмальым фторироватлыме да реминерализироватлыме йӧн-влакын полшымышт дене пеҥгыдемдаш лиеш.
Стоматологический инфекций ваштареш прививке уке, но инфекциян чер деч вакцинаций да организмын тазалыкшым чарныде эскерыме сай койыш умшагӧргын тазалыкшылан пайдале улыт.
Стоматолог деке идалыкыште ик гана деч шуэн огыл коштман, иктаж-могай ситыдымаш тургыжландарыме годым – чӱчкыдынрак.
Пӱйшылын тазалыкшым тӱткын эскерыман: вӱр йогымо, пуалме, корштымо годым, жапым шуйкалыде, стоматологын приёмышкыжо кайыман.
Йылмын арулыкшыланат кугу тӱткышым ойырыман.
Пӱй ден пӱйшылым Умшагӧркын тазалыкышым эскерыме арнян веле огыл, а кажне кечын, ӱмыр мучко шотышто кучаш тыршыман – тиде кажне айдемын ответственностьшо.
Тек тиде арня илыш-йӱлана, пеҥгыдемдалтше койышна нерген шоналташ амалым ышта да умшагӧргӧ тазалыклан утларак кугу тӱткышым ойыраш полша.
Андрей КУЗНЕЦОВ,
Йошкар-Оласе йоча стоматологический поликлиникын тӱҥ врачшын пашажым шуктышо.
Маргарита ИВАНОВА ямдылен.
Марий Эл Тазалык аралтыш министерствын пресс-службыжын фотожо.
