Тамакым шупшшо ятыр еҥ осал койыш деч кальян полшымо дене утлаш лиеш манын шона. Тиде чынжак огыл. Сигарет дене таҥастарымаште никотин кальян тамакыште палынак шагал гынат, садак уло! Сандене тудын деке тымарте шупшдымо айдемат куштылгын тунемын кертеш.
Вес йоҥылыш шонымаш: кальян лӱдыкшыдымырак, молан манаш гын чоҥалтмыж дене прибор эҥше шӱй да тамак гыч лекше шикшым вӱд, тыгак тӱрлӧ фильтрже вошт колта, яндарракым ышта. Чаманен палемдыман, эсогыл тыгай фильтраций шикшым чыла осал вещества да вартыш деч тичмашын эрыктен ок керт.
Роспотребнадзорын Марий Элысе виктемжын специалистше-влак тыгай иктешлымашке шуыныт: айдеме кальяным кокла шот дене кок шагат шупшеш. Тиде жапыште шодо да вӱргорно стенкыш тегыт тамакым шупшмо деч шагал огыл шинчеш.
Тылеч посна кальяным тӱҥ шотышто икмыняр еҥ шупшеш, сандене респираторный инфекций дене веле огыл, эсогыл В гепатит, ужармужо (туберкулёз), мундштукыш логалше шӱвыл дене куснышо моло чер дене черланен кертме лӱдыкшӧ моткоч кугу.
Кальяным шупшшо-влак воктене шинчыше шупшдымо еҥ тамакым шупшшо дене тӧр. Тиде случайыште южыш лекше тӱрлӧ веществаш эше кальянлан ямдылыме пу шӱйын йӱлышӧ продуктшо – углеродын окисьше да моло химический ушалтмаш – ешаралтыт.
Чыла тидым шотыш налын, иктешлен каласаш гын, кальян тамакым шупшмо койыш да кумыл деч утлаш ок полшо. Таче тамакым кудалтыме ятыр йӧн уло. Осал койыш деч шке семын, шке вий дене утлаш огешак лий гын, врачын полышыжлан эҥерташ шотлан толеш.
М.ИВАНОВА.
