Марий Элыште 15 ноябрь гыч 3 декабрь марте республик кӱкшытан «Бей в набат!» акций латкудымшо гана эрта. Тудо подростко-влак ден молодёжь коклаште таза илыш-йӱлам чапландарымашке, самырык тукымын тӱняончалтышыжым наркотик ваштареш савырымашке виктаралтын.
Акций кышкарыште республик кӱкшытан икмыняр мероприятийым организоватлыме:
- 15 ноябрьыште Республиканский наркодиспансерыште «Шинчымашым пуымо организацийлаште наркоманий деч профилактикым эртарыме нерген» теме дене семинар лийын;
- таче, 19 ноябрьыште, регионысо социальный педагог ден психолог-шамыч «Доверие» рӱдерыште эртаралтше «Ийготыш шудымо-влакын чын илыш деч кораҥме койышыштым педагогике да психологий велым тӧрлатымаш» теме дене практике шотан семинарыш чумыргеныт;
- 15 гыч 27 ноябрь йотке шинчымашым пуымо поро кумыл объединений-влакын психоактивный вещества дене пайдаланыме деч профилактикым эртарыме да таза илыш-йӱлам чапландарыме шотышто презентаций конкурсышт эртаралтеш;
- 21-22 ноябрьыште Йошкар-Оласе медицине колледжыште агитбригаде ден усталык коллектив-влакын «Ме таза илыш-йӱла верч улына» конкурсышт лиеш;
- 26 ноябрьыште тиде тӧнежыштак «Ме таза илыш-йӱла верч улына» молодёжный форум эртаралтеш;
- 27 ноябрьыште Юл кундем кугыжаныш технологий институтышто «Марий Элыште наркоманий деч профилактикым эртарыме у йӧн-влак» теме дене науко-практике конференций лиеш;
- 28 ноябрьыште Йошкар-Оласе Самырык-влакын полатыштышт Доброволец-влакын школышкышт коштшо-влаклан «Доброволец-шамычын ПАВ дене пайдаланыме деч профилактикым эртарыме да таза илыш-йӱлам чапландарыме шотышто паша йӧнышт» теме дене семинар ден тренинг эртаралтыт;
- 3 декабрьыште Самырык-влакын полатыштышт акцийым мучашлыше мероприятий-влак: усталык программе, СПИД дене кучедалме кече вашеш площадке, акцийым иктешлымаш да саламлымаш – лийыт.
Организаций ден тӧнежлаште Марий Элыште МВД-н Наркоконтроль виктемжын, Республиканский наркодиспансерын, Калыклан психолого-педагогический да социальный полышым пуымо «Доверие» рӱдерын, Йошкар-Оласе Самырык-влакын полатыштын, «Айык Марий Эл» мер организацийын, «Волонтёр-медик-влак» всероссийский мер толкынын регионысо пӧлкажын, СПИД-рӱдерын еҥже-влак усталык конкурс, фестиваль, увер-сотемдарымаш мероприятий ден урок-влакым эртарат.
М.ИВАНОВА
