Марий Элыште у коронавирус инфекций дене черланыше-влакын чотышт кугемын. Таче, 5 апрельыште, эше индеш диагнозым пеҥгыдемдыме нерген пален налме. Тыгеракын, регионыштына 29 март гыч COVID-2019 диагнозым латкум еҥлан шындыме.
«Чыла индеш еҥ тылеч ончыч черланыше-влак дене кылым кучен. Нунын анализыштым эртыше арня тӱҥалтыште Москвашке тергаш колтымо ыле. Таче Россий Федераций Роспотребнадзорын Противочумный рӱдержын референс-рӱдерыштыже «положительный» результат-влакым официально пеҥгыдемденыт. Врач-шамыч мыйым палдареныт, чыла пациентын черже куштылго формо дене эрта», – манын Марий Элым вуйлатыше Александр Евстифеев.
Регионым вуйлатыше тыгак чыла еҥлан, поснак писынрак черланен кертме тӱшкаш пурышо-влаклан, посна улмо режимын кӱлешлыкше нерген ушештарен.
«Черын шарлымыжым мыняр писын шогалтен кертмына кажнына дене кылдалтын. Сандене шекланыме мерым шуктыманак. Уремышке арам лектын коштман огыл, посна улмо режимым шуктыман. У коронавирус инфекцийын республик кумдыкыштына шарлен кертмыж деч лачшымак тиде йодмашым пеҥгыдын шукташ кӱлеш», – эше ик гана палемден Марий Элым вуйлатыше Александр Евстифеев.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
