Калык у коронавирус инфекций дене шуэнрак черланаш тӱҥалын. Тидын дене келшышын, республикын кучемже регионын медицине организацийлаштыже амбулаторий-поликлиике отделений-влаклан угыч пашам ышташ тӱҥалаш йӧным ыштен.
Поликлинике-влакын пашам ыштыме икымше тылзышт противоэпидемиологический режимым шуктымо да граждан-шамычым ончылгоч возалтме почеш приниматлыме дене калыкым иквереш погынымо деч кораҥден да тидын дене у коронавирус инфекций дене черланен сеҥыме лӱдыкшым иземден кертмым ончыктен, палемден оперштабын черетан заседанийыштыже тазалыкым аралыме министрын алмаштышыже Татьяна Королева.
Республикым вуйлатыше калыклан врач-шамыч деке ончылгоч возалтме йӧнын кӱлешлыкшым умылтараш кӱлмым палемден, молан манаш гын шагал огыл еҥ чараклыме мере-шамыч дене пешыже ынеж келше, кеч чылажат пациентын лӱдыкшыдымылыкшӧ верч ышталтеш.
Т.Королева оперштабын еҥже-влаклан кугыеҥ-шамычлан диспансеризацийым 27 июль гыч угыч эртараш тӱҥалме йодышым ончаш темлен. Тыгак республикым вуйлатыше Александр Евстифеевлан коронавирусан пациент-шамыч дене кылым кучышо медицине пашаеҥ-шамычлан Карась ер серыште чылт яра каналташ йӧным ыштымыжлан тауштен.
Республикыштына коронавирусан черле-влаклан медицине полышым пуашлан 810 профильный койкым шындыме, 21 июльышто тушто 555 черле киен. Тидыже койко фонд гыч 68 процент лийын. Ковидный манме отделенийлашке 63 ИВЛ-аппаратым шындыме. Август мучаш марте эше тынарымак кондаш палемдыме. Тылеч посна Йошкар-Оласе больницыш шке семын шӱлен кертдыме пациент-влаклан ЭКМО-аппаратым вераҥдыме.
«Пытартыш кум кечыште койко-влакын ярсымыштым ужына. Сай тенденцийлан ӱшаныме шуэш ыле, но тидын нерген ойлаш эше эр», — палемден Татьяна Королева.
РФ правительствын распоряженийже дене келшышын, медицине пашаеҥ-влаклан кумылаҥдыше выплатым умбакыже тӱлат. Республикыштына ойыртемалтше пашалан да ешартыш нагрузкылан чылаже 6043 выплатым ыштыме. Тудын чумыр суммыжо 87 млн. теҥгеш шуын. Поснак кӱлешан пашам шуктымылан пытартыш 3 тылзыште 146 млн. 220 тӱжем теҥгеаш 3 тӱжем наре выплатым тӱлымӧ.
Т.Королеван мутшо почеш, республикысе медицине тӧнежлаште шкем аралыме средстве ден эмым ситышын шапашлыме.
Регионым вуйлатыше коронавирусан черле-влакым эмлаш келыштарыме больнице-шамычым ончычсо паша радамышкышт пӧртылтымӧ йодышым лончылаш кӱштен.
«Российын Минздравше койко-влак норматив шотышто йодмашыжым вашталтен огыл. Ме шкеак тудын чотшым 810 марте шуктенна, да южгунам чыланат айлыме лийыныт. Но ынде нуным эркын дене ярсыктарышаш улына», — манын А.Евстифеев.
«Эн ончычак ковидный койко-шамычым Сар-влакын ветераныштын госпитальыштышт петырена. Кызыт тушто 60 гыч 31 койкышто эмлалтыт. Кодшо пациент-влакым эмлыме моло тӧнежыш кусарена», — вашештен министрын алмаштышыже.
Ушештарена, Марий Элыште утларак ямде улмо режимым 25 июль марте шуйымо. Республикна кызыт чараклыме мере-влакым кораҥдыме кокымшо йыжыҥ ончылно шога. 23 июль эрдене у коронавирус инфекций дене черланыме 27 у случайым рашемдыме, да тиде чот пандемий пагытыште 3601 марте шуын. Теҥгече эрдене республикысе инфекционный стационарлаште чылаже 552 еҥ киен, ты чот гыч 197 пациентлан «Covid-19» диагнозым шындыме, 127 черле неле состоянийыште лийын, 9 еҥ шодым искусственно вентилироватлыме йӧн дене шӱлен, 207 пациентлан кислород кӱлын.
Марий Элын организаций да аналитике виктемжын уверже негызеш М.ИВАНОВА ямдылен
