Марий Турек посёлкысо ий полат хоккейым йӧратыше шуко кумылан еҥым чумырышо верыш савырнен.
2011 ийыште, Ий полат почылтмеке, ты кундемыште икмыняр хоккей команде чумыралтын. Изиракышт «Сатурн», кугурак ийготан-шамыч «Восток», а ий полатыште тыршыше-влак «Спортивные сооружения» командыштын чапшыштым тӱрлӧ таҥасымаште араленыт. Нуно республик, Россий кӱкшытыштӧ модыныт, сай результатым ончыктеныт. Тидым ий полатын фойеште келыштарыме витриныште аралалтше кубок-влак пеҥгыдемдат.
Витле ияш деч кугурак-влак тале хоккеист-шамыч самырык тукымлан пример семын лийыныт. Чаманен каласыман, таче кечылан ты тӱшкаште сборный командым чумыраш неле, сандене кумыланышт вес командыш кусненыт. Нунын кокла гыч иктыже – капка орол Юрий Петров.
– Мыланем хоккей моткоч келша. «Ариада», «Дружба» команде-влак модаш ӱжыт. Сандене кертмем семын тыршем, легионер гай улам. Кызыт «Ночная лига» турнирыште вием тергем. Тыште сеҥыше команде кажне ийын май тылзыште Сочиште эртыше всероссийский хоккей фестивальыш кая. Ӱмаште меат тушто лийынна, – каласкала вратарь Юрий Александрович. – Тидыжым илышыш шкешотан ойыртемым пуртымо семынат пеҥгыдемдыман. Тушто Россий, тӱнямбал кӱкшытыштӧ чапланыше хоккеист-влак дене вашлийына, лекше йодышым пырля каҥашена.
Юрий Петров ик гана веле огыл республик кӱкшытышто «Эн сай вратарь» семын палемдалтын. Тыгак тудо шке кундемыштыже «БЭГиЗ» (рушла: Быстрые, Энергичные, Грациозные и Задорные маналтеш) футбол командым чумырен. Тидат ял ден селалаште футболым вияҥдыме семын ышталтын.
Елена Эшкинина
