Марий Элыште «Идалыкын студентше» Россий национальный премийын регионысо ужашыже иктешлалтын.
Тений куд посна да ныл тӱшка номинаций лийыныт. Заочно эртыше этапыште эксперт-влак 47 еҥын портфолиоштым акленыт, очный ужашыш 30 студентым ойыреныт. Финалыште нунылан кок тергымаш лийын: шке нерген палдарымаш да эксперт-влак дене вашмутланымаш.
Сеҥыше, лауреат-шамычым Марий Элын ончылтен профессионально ямдылыме рӱдерыште саламленыт. Республикын образований да науко министржын алмаштышыже А.Иванов палемден: тыгай конкурс кажне студентлан ончыкылыкыштлан пайдале.
Сеҥыше-влакын лӱмышт:
«Идалыкын общественникше» — Дарья Пунгина (Оршанкысе И.К.Глушков лӱмеш шуко профилян колледж);
«Идалыкын профессионалже» — Милана Петрова (Йошкар-Оласе строительный техникум);
«Идалыкын старостаже» — Софья Свинцова (Оршанкысе И.К.Глушков лӱмеш шуко профилян колледж);
«Идалыкын усталык шӱлышан личностьшо» — Анна Короткова (И.С.Палантай лӱмеш Марий республикысе тӱвыра да сымыктыш колледж);
«Идалыкын спортсменже» — Егор Кузнецов (Олимпийский резерв училище).
Палемдыме студент-влак Марий Элын чапшым Россий кӱкшытыштӧ аралаш тӱҥалыт.
Г.Кожевникова
Фотом Марий Эл Образований да науко министерстве гыч налме