Йошкар-Олаште вич корно участкым олмыкташ подрядчик-влакым рашемдыме паша тӱҥалын.
2021 ийыште «Сай качестван лӱдыкшыдымӧ корно» нацпроект дене келшышын, Йошкар-Олаште Вараксин кӱварым капитально олмыктеныт, Водопроводный, Советский, Эшкинин, Панфилов да икмыняр моло уремыште корно ужаш-влакым шотыш конденыт.
Кызытсе жапыште нацпроектым 2023 ийыште шуктышаш планыш пуртымо объект-влаклан контрактым ыштыме конкурентный манме процедур-влак эртаралтыт. Тыгодым Йошкар-Ола администраций ден республикын Транспорт да корно озанлык министерствыже корным олмыктымо пашам идалыклан ончычрак, 2022 ийыште, тӱҥалаш палемдат.
Рӱдолан теве могай уремлаштыже ачалыме пашам ышташ палемдалтеш:
— Успенский уремыште (Первомайский гыч Гагарин урем марте);
— Волков уремыште (Красноармейский гыч Водопроводный урем марте);
— Строитель уремыште (Машиностроитель урем гыч кӱртньыгорно переезд марте);
— Вашский уремыште (Карл Маркс урем гыч Гагарин урем марте);
— Анциферов уремыште (Свердлов урем гыч Суворов урем марте).
Тамле сий дене кумылыштым нӧлтеныт
4 февральыште Сай кумыл кече палемдалтын.
Тидым шотыш налын, тудым ойыртемалтшын эртарымашке «Йошкар-Ола» ола округын Депутат-влак погынымашыжын депутатше-влак Антон Волков, Вера Вертинская, Евгения Синушкина, Оласе собранийыште «Единый Россий» фракций вуйлатыше Игорь Загайнов, тыгак «Единый Россий» партийын волонтёр-влак рӱдержын еҥже Ирина Ямбулатова ушненыт. Нуно кызытсе куштылго огыл пандемий жапыште рӱдоласе поликлиникылаште тыршыше-влакын кумылыштым нӧлталаш мутланен келшеныт да лачка кочкышым, когыльым, кӱэштме моло сийым намиеныт.
Полшаш шонеда – ушныза
Йошкар-Олан #МыВместе муниципал штабышкыже волонтер-влакым погымо нерген увертарыме.
Тидыже теве мо дене кылдалтын: пандемий жапыште нунын полышыштлан эҥерташ кумылан-влакын чотышт палынак кушкын толеш. Улшо еҥ-влаклан гына чылашт дене миен шуаш неле. Ты амал дене кумылан-влакым погымо нерген увертареныт.
Шкет илыше, шоҥгыеҥ-влаклан полшымо (кочкыш сатум, эмым намиен пуымо) деч посна волонтер-влак теве кушто чотак кӱлыт:
— стационарлаште да поликлиникылаште (документ дене пашам ышташ, пациент-влакым кӱлеш кабинетыш виктараш але ужалтараш);
— колл-рӱдерлаште але поликлиникылаште, тыгак хронический черан еҥ-влакын тазалыкышт могай улмым дистанционно эскераш (мониторинг);
— автоволонтерство полышым пуымаште (черле еҥ-влак деке мӧҥгышкышт каяш кӱлмӧ годым медицине пашаеҥ-влакым намиен кондаш).
#МыВместе штабын волонтержо лияш теве мом шотыш налман:
— тиде пашашке ушнаш кумылан еҥ 18 ий деч кугурак лийшаш;
— мывместе.рф сайтыште регистрацийым эртышаш;
— вакцинироватлалтше лийшаш але у коронавирус инфекций (COVID-19) дене 6 тылзе деч ончыч черланымыжым да тӧрланымыжым пеҥгыдемдыше документше (медицине организаций деч) але коронавирус инфекций ваштареш вакцинацийым эртыме деч медотводшо лийшаш;
— Йошкар-Ола администрацийын Физический культур, спорт да молодежный политике управленийышкыже 38-05-70 телефон дене йыҥгыртыман.
Йошкар-Ола – 5-ше верыште
Ӱмаште Йошкар-Олаште 186 тӱжем квадратный метр кумдык илыме верыш еҥ-влак илаш пуреныт.
Тыгай данный дене Маристат палдара. Рашемдыме почеш, тидыже – республикыште чоҥымо чыла кугыт гыч пелыже.
Застройщик-организаций-влак рӱдолаште шуко пачеран 30 пӧртым (2,6 тӱжем пачерым) сдатленыт. Чоҥымо паша «Мирный», «Фестивальный», 9-ше, 9Б, 9В микрорайонлаште да Семеновка селаште шукталтын. 1 квадратный метр илыме верын кокла акше ӱмаште 45,6 тӱжем теҥгешке шуын.
Индивидуальный застройщик-влак 107 илыме пӧртым, чылаже 22,2 тӱжем квадратный метрым, чоҥеныт (уэмден тӧрлатеныт).
Юл кундем федеральный округышко пурышо регион-влакын 14 рӱдолашт коклаште илыме верым ситарыме шот дене Йошкар-Ола визымше верыште. Мемнан рӱдолам Пенза (30,6 кв.м.), Саратов (30,5 кв.м.), Самара (30,1 кв.м.) да Ульяновск веле (28,6 кв.м.) эртеныт. Эн мучаште – Ижевск (22,6 кв.м.)
Чотышт иземын
Йошкар-Олаште пашадыме-влакын чотышт иземын.
Тений идалык тӱҥалтыш гыч Калыклан паша верым ситарыме Йошкар-Оласе рӱдерыш 10310 еҥ миен. Тидыже ӱмашсе тыгаяк жап дене таҥастарымаште 1,7 пачашлан (17145 еҥ лийын) шагалрак.
Палдарыме семын ойлаш гын, утларакше врач, инженер, медсестра, бухгалтер, воспитатель, повар, водитель, механосборочный пашам шуктышо слесарь, монтажник, кондуктор, ургызо, охранник, киндым пыштыше, тракторист, маляр, троллейбус водитель кўлыт.
