Марий Эл вуйлатыше Юрий Зайцев Йошкар-Олалан 440 ий темме пайремлан пӧлеклалтше мероприятий-влакым ямдылыме йодыш дене совещанийым эртарен.
Марий Эл правительстве вуйлатышын алмаштышыже – тӱвыра, печать да калык-влакын пашашт шотышто министр Константин Иванов тиде кугу лӱмгечылан ямдылалтме шотышто оргкомитетым ыштыме нерген ойлен.
Тений 30 январь гыч 4 февраль марте ВДНХ-ште «Россия» тӱнямбал выставке-форумышто Марий Эл Республикын рӱдолажын – Йошкар-Олан – арняже эрташ тӱҥалеш.
Майыште «Города Среднего Поволжья: история и современность» IV регион-влак кокласе научно-практический конференций лиеш, юбилей вашеш «История города Йошкар-Олы» тӱшка монографийым савыктат.
Пайремын кугу мероприятийже-влакым 6 гыч 11 августлан палемдыме. 30 утла площадкыште «Легкие люди» юж иймаш фестиваль, «Марий калык легенде-влак» пу гыч пӱчкедымаш, Изи Какшан мучко вейкбординг дене «Йошкин CUP» таҥасымаш, «ЙошкаЕш» гастрономий фестиваль, ретро-автомобиль-влак фестиваль эртаралтыт.
Йошкар-Ола администраций тӱвыра поянлык объект-влакым аралыме шотышто кугу пашам наҥгаен шога, палемден Константин Иванов. Тидын годымак олан исторический ужашыжым уэмдаш –рашемденрак каласаш гын, Рӱдӧ тӱвыра да каныш паркыш пурымаште аркым реставрироватлаш, Чулковын усадьбыжым олмыкташ – ешартыш средства кӱлеш.
Йошкар-Олан мэрже Евгений Маслов, Олан кечыже олан чыла районыштыжо келыштарыме икмыняр площадкыштыже эрташ тӱҥалеш, манын каласен. Тудын мутшо почеш, мемнам кугу пайрем вуча, тӱрлӧ республик да регион гыч уна-влакым ӱжыт.
«Йошкар-Олаште илыше кажне еҥ пайрем шӱлышым шижшаш, каналтен кертшаш да рӱдолан 440 ияш лӱмгечыже нерген эн сай шарнымашым гына арален кодышаш», – палемден Марий Эл вуйлатыше Юрий Зайцев.
Марий Эл Республикым вуйлатышын
администрацийжын информаций паша пӧлкан
уверже почеш Л.СЕМЕНОВА ямдылен
Д.РЕЧКИНЫН фотожо