Эрла, 8 апрельыште, Йошкар-Олаште арулыкым ыштыме шотышто субботник эрташ тӱҥалеш.
Рӱдоланан уремлажым, кудывечылажым, парк ден скверлажым шӱк-куштыра деч эрыктыме месячник такшым 28 мартыштак тӱҥалын да 29 апрель марте шуйна. Мутлан, «Ола» МУП-ын пашазыже-влак мартыште гына корно тӱрысӧ газонышто 3,5 тонн шӱкшакым поген налыныт. Эрласе субботникыш предприятий, учреждений да организацийласе коллектив, тунемше да студент, мер пашаште чолгалыкым ончыктышо еҥ-влак лектыт. Шукышт паша вер кумдыкыштым эрыктат. Лум йӧршынак шулен пытен огыл гынат, пластик ате, тамак пундаш, пакет-влак да моло шӱкшак ятырак койыт. Мэрийыште рашемдыме почеш, кодшо ийын шошым 2370 тонн лавырам ола деч ӧрдыжкӧ шупшыктымо, калык коштмо кумдыкым 38 тӱжем куб.м шӱк-куштыра деч эрыктыме.
Рӱдолаштына илыше-влакым тыгак 15 да 22 апрельыште субботникыш вучат. Пырля йолташдам, пошкудыдам ӱжыда гын, тӱшка паша чынжымак пайремыш савырна.
Л.СЕМЕНОВА
Фото: М.Скобелевын (архив)
