Уэмден тӧрлатыме деч вара Марий самырык театр ончышо-влаклан шке омсажым уэш тений декабрьыште почшаш. Кызыт тушто паша кузе кайымым ончаш Марий Эл вуйлатыше Юрий Зайцев миен толын.
– 2017 ий гыч пашам жаплан чареныт. 2022 ийыште Российысе Тӱвыра министерствын полшымыж дене пашам умбакыже шуеныт, сметный документацийым ыштеныт. Кызыт паша график дене келшышын шукталтеш, – палемден Юрий Зайцев.
Оралтым 2023 ий кеҥежым «Тӱвыра» нацпроект дене келшышын ачалаш тӱҥалыныт. Але марте театрын тӱжвал вел пырдыжшым икгай сынаным ыштеныт, конструкцийыште лийше экшык-влакым кораҥденыт, леведышым уэмденыт. Полатыште тыгак декорацийым, реквизитым, костюмым аралаш ешартыш вер-влак лийыт.
Театрым ачалаш федеральный бюджет гыч 461 млн. утла, республиканский бюджет гыч 197,6 млн. теҥге ойыралтын. Кызытсе жаплан паша 66 %-лан ышталтын. Зданий 2,3 пачашлан кугемшаш да 9.3 тӱжем квадрат метрым айлаш тӱҥалеш.
Театрым уэмден тӧрлатыме жаплан труппым Шкетан лӱмеш марий кугыжаныш драме театрыш кусареныт. Шке полатыштышт артист-влак ноябрь мучаште пашам ышташ тӱҥалшаш улыт.
Марий Эл Республикым вуйлатышын пресс-службыжын уверже негызеш Л.Камалетдинова ямдылен
