27 мартыште, Театрын тӱнямбал кечынже, «Йошкар-Ола театральная» фестивальым иктешленыт да тӱрлӧ номинацийыште сеҥыше-влаклан Йыван Кырла лӱмеш национальный премийым кучыктеныт.
Фестиваль 22-25 мартыште эртен. Йошкар-Олаште илыше да тудын унаже-влаклан республикысе куд профессионал театр эн сай да ойыртемалтше 11 постановкым ончыктен. Артист-влакын мастарлыкыштым веле огыл, спектакльым сценыш лукташ ямдылыше режиссёр ден сӱретче-шамычын пашаштымат Моско да Йошкар-Ола гыч ныл критик аклен.
– Йошкар-Олам ончычсекак палем, музыкальный театрын пашажымат шукертсек эскерем. Жюриште лийме дене драме театр-шамычын тыршымыштымат ужаш логале. Артист-влак моткоч талантан улыт, сандене фестивальын эртымыжым шижынат шым шукто. Кажне спектакльыште ала-мом уым ужынам, – палемден Моско критик, «PRO Танец» журналын обозревательже Александр Максов. – Постановко-влак кокла гыч «Белый лебедь» ден «Хрустальный дворец» балет-влак чотак келшышт. Кокымшыжым лач ик гана Кремльыште ончыктеныт улмаш. Ятыр жап эртымеке, тудым Йошкар-Олаште ужаш моткоч куанле ыле, вет сценыште артист-влак дене пырля имне, кӧгӧрчен да молат лийыныт.
Театрын тӱнямбал кечыжлан пӧлеклалтше пайрем ты гана Курчак театрыште эртен. Тусо артист-влак моткоч оҥай да мыскара шӱлышан пайрем программым ямдылен. Залыште молгунамсе семын ончаш толшо-влак огыл, а театр искусствым вияҥдымаште тыршыше-влак зал тич лийыныт. Нуным пайрем дене эн ончычак Марий Эл правительстве председательын икымше алмаштышыже Михаил Васютин саламлен да регион вуйлатыше Александр Евстифеевын ӱшанен пуымо сомылжым шуктен – театр искусствым вияҥдымаште тыршыше-влаклан кугыжаныш наградым кучыктен. Марий самырык театрын актрисыже Надежда Четкарёва «Марий Элын сулло артистше», Курчак театрын художник-конструкторжо Александр Паткиев «Марий Эл культурын сулло пашаеҥже» лӱм дене палемдалтыныт.
Пайремын озаже-влак тыгак Тӱвыра, савыктыш да калык-влакын пашашт шотышто министр Константин Иванов ден Марий Эл Кугыжаныш Погын депутат Наталья Пушкина деч саламлымашым налыныт.
Сеҥыше-влакым тӱрлӧ номинацийыште палемденыт:
– Гран-при – «Хрустальный дворец» балет (Э.Сапаев лӱмеш опер да балет академический театр);
– «Эн сай режиссур» — Владислав Константинов (Г.Константинов лӱмеш руш академический драме театр, «Сладострастники»); Степан Пектеев (М.Шкетан лӱмеш марий национальный драме театр, «Folks»);
– «Эн сай сценографий» — Борис Голодницкий (Э.Сапаев лӱмеш опер да балет академический театр);
– «Эпизодысо эн сай роль» – Юрий Алексеев (М.Шкетан лӱмеш марий национальный драме театр);
– Сергей Данилов (М.Шкетан лӱмеш марий национальный драме театр);
– «Курчак театрыште эн сай роль» – Евгений Насупа (Республикысе Курчак театр);
– «Эн сай мурымо партий» – Валерия Баландина (Э.Сапаев лӱмеш опер да балет академический театр);
– «Балетыште эн сай партий» — Кристина Михайлова ден Итару Нада (Э.Сапаев лӱмеш опер да балет академический театр);
– «Драме спектакльыште эн сай роль» — Галина Соловьёва (Марий самырык театр);
– «Драме спектакльыште эн сай пӧръеҥ роль» – Антон Типикин (Г.Константинов лӱмеш академический руш драме театр);
– «Кокымшо планан эн сай пӧръеҥ роль» — Сергей Матюшкин (Г.Константинов лӱмеш руш академический драме театр);
– «Кокымшо планан эн сай ӱдырамаш роль» — Светлана Сергеева (Э.Сапаев лӱмеш опер да балет академический театр); Наталья Ложкина (Г.Константинов лӱмеш руш академический драме театр);
– жюрин посна ямдылыме «Сцене дуэт» премийже — Анна Григорьева ден Иван Мелехин, Артём Васильев ден Роман Стариков (Э.Сапаев лӱмеш опер да балет академический театр);
– «Ӱшан» – Софья Козлова, Арина Запылихина, Елена Ямбаршева, Александр Кириллов, Андрей Макаров (Республикысе Курчак театр);
– «Зритель-влакын симпатийышт» приз — Светлана Александрова (М.Шкетан лӱмеш Марий национальный драме театр);
– «За честь и достоинство» – Ева Коваленко (Э.Сапаев лӱмеш опер да балет академический театр);
– СТД председательын премийже – Надежда Репьева (Э.Сапаев лӱмеш опер да балет академический театр);
– СТД председательын «Усталык командировко» премийже – Марина Почтенева (М.Шкетан лӱмеш Марий национальный драме театр);
– директорын премийже – Марианна Сильвестрова (Республикысе Курчак театр);
– мэрын премийже – Владислав Константинов (Г.Константинов лӱмеш академический руш драме театр).
АЛЕВТИНА БАЙКОВА
Е.Никифоровын фотожо
