Элыштына шукерте огыл «Хоккейные папы» фильмым ямдылен шуктеныт да 23 ноябрь гыч экраныште ончыкташ тӱҥалыныт. Киношко билетым «Пушкин карт» дене налаш лиеш.
Режиссер Андрей Булатовын фильмыштыже регионысо тренерын йоча спорт команде верч кучедалмыже нерген ойлалтеш.
Фильмын тӱҥ геройжо – Андрей, тудо «Суровые тигры» хоккей командым вуйлата. Ты рольым Алексей Бардуков модеш.
– Мыйын персонажем – сай, поро кумылан, мо кӱлешым палыше. Тудо чын спортсмен семын шке цельышкыже шуаш тырша. Но южгунам илышыште йоҥылышым ыштен колта гынат, тудым пеш вашке тӧрла. Тиде рольлан кӧра хоккейым йӧратен шындышым, – интернетысе ик интервьюштыжо тыге каласен Бардуков.
Кином Российын икмыняр оласе павильонышто, ий ареныште сниматленыт.
Фильмыште чапланыше актёр-влак Владимир Яглыч, Михаил Пореченков, мурызо Полина Гагарина, Юрий Чурсин да тыгак йоча хоккей команде ден кумдан палыме хоккеист Александр Якушев ден Алексей Касатонов войзалтыныт.
А.Байкова
