22 мартыште «Сеҥымаш тулсавыш» фестивальыште Медведево районысе усталык коллектив-влак «Россий – мыйын йӧратымашем» программым ончыктеныт.
– Фестиваль гоч ме шкенан элна дене кугешнен, тушман ваштареш геройлын шогышо-влакын подвигышт нерген ойлен кертына. Кызытсе жапыштат элнан историйжым вес семын возаш эрыкым пуышаш огынал: тудо могай лийын, тугайымак ончыкылык тукымлан кодышаш улына. Кугу сеҥымашым лишемдыше ачана, кочана-влак семынак спецоперацийыште боецна-влак Российын эрыкшым ӱшанлын аралат, – фестивальын эмблемыжым кидышкыже налмеке, каласыш Медведево район администраций вуйлатыше Денис Окулов.
Ты кундемын концерт программыжым совет салтакын тушманым кырен шалатыме да тылыште тыршыше-влакын подвигыштым почын ончыктышо муро, куштымаш дене чумырымо. Поснак «Маска» калык театрын «У войны не женское лицо» спектакль гыч ужашлам модын ончыктымыжо чоныш логале. Чон йӧсым «Позитив» студийын «Горе, моё горе» муро почеш куштымашат почын ончыктыш.
Юлия Шобурован «Это просто война» произведенийым мастарын лудмыжо ӱмбакем йӱштӧ вӱдым опталме гаяк лие – сарыште лийше ӱдырын сӧй пасушто сусыргышо, окопышто рокеш варналтше да вӱрвузык кийыше-влак коклаште илышым кычалмыж нерген сылнымут корныла почеш шучко сӱрет эсогыл шинча ончылнемат сӱретлалте.
Ленинград блокаде годым шужен да кылмен илыме пагытын эҥгекше «Позитив» студийын куштымашыже да экранысе сӱретла гоч кумылым волтыш.
Экраныште возымо гочак весымат пален нална: Медведево район гыч 80 утла ӱдырамаш фронт корным тошкен. Нунын коклаште лётчик, зенитчик, связист, санитарке, врач, снайпер, разведчик, пулеметчик да молат лийыныт.
Концерт программым «Россия – это мы» да «Россия» мурыла дене мучашлыме шочмо кундемым эшеат йӧраташ да тудын дене кугешнаш таратышт.
«Сеҥымаш тулсавыш» фестивальын финалже 7 майыште лиеш. Тушто тӱрлӧ район ден оласе коллектив-влак мастарлыкым ончыктат.
Алевтина БАЙКОВА
Иван Речкинын фотожо
