Шернур район гыч тӱвыра пашаеҥ Саша Иванов йолташыже-влакын усталык пашаштым эреак эскера. Теве кодшо гана тудо велыш мийыме годым Кускин ялын тале музыкантше, гармоньчо Геннадий Михайлов дене палымым ышташ шонен да ялышкыже Шернур гыч шкежак автомашинаж дене наҥгайыш.
Ял тӱҥалтышысе икымше пӧрт ончыко автомашина дене миен шогалмеке, капкам почын, илалше пӧръеҥ ончале.
– О-о-о, Саша Иванов, – тыге манын саламлалте тудо да ятыр ийлан изирак йолташыж дене мутланаш тӱҥале. – Теве монча коҥгаш олтенам да жапын-жапын ончалаш лектын пурем. Уремыште да тошкемыште куштырам эрыктенна, тений кок олмапум пӱчкын кудалтышна, ынде грушым шындаш шонена. Кече чотрак ырыкташ тӱҥалмеке, чоҥымо пашам вораҥдарен колтыман, шол.
Сурт оралте воктеныже пырня дене нӧлтен шогалтыме пӧрт торашке волгалтеш. Илалше пӧръеҥ шкетынак пурам руэн, нӧлтен, леведышым ыштен улмаш. Южгунам гана пелашыже кучылташ полышкален. Пӧрт кӧргым ончалаш лӱмынак тошкалтышым шогалтыш да окна гыч мемнам пуртыш. Кумда, йоҥгыдо… пушеҥгын свежа пушыжо йоча пагытыш пӧртылтыш.
– Школышто сайын тунемынам, математике дене олимпиадыш коштынам, Нижний Новгородыш шумешат миен шуынам, – кумылын пелештыш Геннадий. – Садлан плотник паша мылам пеш лишыл. Теве пӧрт кӧргым ыштен шуктемат, илаш куснена.
Геннадий Васильевич омса, окна янакламат шкежак ыштылеш. Ты пашалан тудо ачаж дечак тунемын кодын. Тудыжо тале столяр лийын.
– Ачамын уке лиймекыже, авам тыге ойлен шортеш ыле: «Эх, кучылтмо ӱзгаржат рӱдаҥешыс…» Тыге эркын-эркынак ты пашам шукташ тӱҥалынам, – чонжым почо илалше пӧръеҥ да воштылалын ешарыш: – Тиде амал денак 1990 ийыште Кускин ялыш верысе совхоз вуйлатышын ачаже, Леонид Петрович Пушкарёв, деке толын лектынам да тачат тыштак улам. Тунам пелаш лийшашын шольыжо пашам ыштымем ужын да «чатка плотник улат, мыйынат оньыкувамлан ышташ кӱлеш» манын. Йодмым шукташ келшенам да ялысе школ библиотекыште пашам ыштыше Вера Васильева дене палыме лийынам. Тунам тудо эше кочкаш ямдылышыланат, арулыкым эскерышыланат тыршен. Мыйымат ты школыш баяным шокташ ятыр гана ӱжыныт.
Икмыняр жап ончыч пелашыж дене ойырлышо пӧръеҥлан Немда эҥер, чодыра воктенысе ял пеш келшен да поро кумылан ӱдырамаш дене илаш тӱҥалын.
Тиддеч вара Геннадий Васильевичын мастар кидан улмыжым тысе калыкат пален налын да тӱрлӧ пашаш ӱжаш тӱҥалын. Тидын марте мыняр пӧртым нӧлтен – шкежат раш каласен ыш керт.
Марий театрыштат шоктен
Г.Михайлов Кужэҥер район Саламатнурышто шочын-кушкын.
!!!Материалым тичмашнек 19 майыште лекше номерыште лудын кертыда!!!
А.БАЙКОВА
Авторын фотожо
