Калык-влакын пашашт шотышто федерал агентстве (ФАДН) республикышкына толшо йот эл граждан-влакым социально-культурно адаптироватлыме шотышто Марий Эллан кӱкшӧ акым пуэн.
Регион вуйлатыше Юрий Зайцев агентствым вуйлатышын алмаштышыже Станислав Бедкин дене вашлийын. Нуно элыште калык-влакын икоян улмыштым пеҥгыдемдымашке виктаралтше проект-влакым илышыш шыҥдарен толмо дене кылдалтше йодышлам каҥашеныт. Станислав Бедкинын палемдымыж почеш, республикыште кугыжаныш национальный политикылан кугу тӱткыш ойыралтеш. Культур да социальный сферыште ик координатор улмылан кӧра ты йодышым комплексно решатлаш йӧн уло. Йылмым цифроватлыме шотыштат Марий Эл ик эн ончылно кая. Станислав Бедкин республик вуйлатышылан миграций дене кылдалтше политике, тыгак йот элысе граждан-влакым социально-культурно адаптироватлыме йодыш-влаклан поснак кугу тӱткышым ойырымылан тауштен.
Вашлиймаште тыгак Марий Элыште тений кеҥежым эртараш палемдыме Финн-угор калык-влакын III всероссийский форумышт дене кылдалтше йодышым каҥашеныт.
«Марий Эл – шуко тӱрлӧ калыкын икоян илыме ойыртемалтше пример. Пытартыш перепись почеш республикыште 677 тӱжем еҥ ила. Нуно 50 утла калыкын еҥышт улыт. Форум этнос-влак кокласе диалогым вияҥдаш полшышаш», – каласен Юрий Зайцев.
Станислав Бедкин республикыште эртышашлык финн-угор форумын геополитический кӱлешлыкшым палемден.
Марий Эл вуйлатышын пресс-службын уверже негызеш Светлана Носова ямдылен.
