Марий Эл гыч «Марий жемчуг падыраш-влак» команде – «Образованийын флагманже» всероссийский конкурсын 100 финалистше-влак коклаште.
Тиде командыште – Медведево районысо Йоча усталык пӧртын педагогшо-влак:
– Наталья Кудрявцева (Йоча усталык пӧртын директоржо, командын капитанже);
– Ирина Гладышева (вуйлатышын алмаштышыже);
– Татьяна Кудрявцева (методист);
– Лилия Сазонова (ешартыш образований туныктышо);
– Анастасия Папаева (педагог-организатор, ешартыш образований туныктышо).
Команде конкурсышто «Российысе калык-влакын икоян улмышт» направлений дене самырык тукымым воспитатлыме дене кылдалтше «Мари калык – Российын шӱшерыштыже жемчуг падыраш» пашажым ончыктен. Тудын тӱҥ шонымашыже – марий тӱвыра дене палдарыме гоч йоча-влакым икте-весым пагалаш, ваш-ваш полшен илаш кумылаҥдаш, тыгак калык-влакын келшымашыштын кӱлешлыкшым умылтараш.
Туныктышо-влак эн ончычак кагаз дене тӱрлӧ калык вургеман курчак-шамыч полшымо калык-влакын ойыртемыштым, вара марий калык дене кылдалтше мультфильм ден легендым ончыктат. Умбакыже йоча-шамыч ныл командылан шелалтыт. Тыгодым нуно «шкеныштыным» огыт ойыро, а пырля улшо-влак дене пашам ышташ тунемыт: ныл станций еда путешествийыш лектыт. Станций-шамыч тыгай улыт: «Учим марийский» (мутер-влак дене паша), «Брошь-монисто» (фетр да шер пырче-влак дене сӧрастарышым ыштат), «Марийская кухня» (подкогыльым ямдылат), «Марий тӱр» (брелокым сӧрастарат). Тыге кажне команде шкенжын сатужым ямдыла. Мучашлан икте-весылан нуным пӧлеклат.
– Тиде конкурсын финалыштыже 2023 ийыште участвоватленам, сандене каласен кертам: тиде у шонымашым шочыктышо моткоч сай кумдык. Сандене «Россий – йӧным пуышо эл» платформын проектлашкыже ушнаш темлем», – ойла командын капитанже.
Конкурсын финалже 18-21 ноябрьыште Москваште лиеш. Тушто мемнан команде элнан рӱдолаштыже верланыше школышто тунемше-влак дене занятийым эртарышаш. Тидлан ик шагат пуалтеш.
Умбакыже финалист-влакым «Педагогический кейс» тергымаш вуча.
Чыла тидын деч вара 10 эн виян командым ойырат, нуным сеҥыше семын палемдат
Конкурс «Молодёжь да йоча-влак» нацпроектын «Россий – йӧным пуышо эл» федеральный проектше почеш Росмолодёжьын полшымыж дене эртаралтеш.
Росмолодёжьын пресс-службыжын уверже негызеш Галина кожевникова ямдылен.
Фотом Медведево районысо Йоча усталык пӧртын соцкылысе лаштыкше гыч налме.
