«Таир» интернат-пӧртыштӧ илыше-шамычлан усталыклан да вияҥаш келыштарыме у кумдыкын презентацийже эртен.
Мероприятийыште Марий Эл правительстве председательын алмаштышыже Ольга Фёдорова, калык илышым саемдыме шотышто министр Марина Островская, Калык илышым саемдыме шотышто министерстве пеленысе Мер советын еҥже-влак участвоватленыт. Ӱжмӧ уна-шамыч уэмдыме залым акленыт, интернатыште илыше-влакын яра жапым эртарымышт дене палыме лийыныт, пайрем концертым онченыт.
Уэмдыме залым тематике шот дене икмыняр зонылан шелме, тушто шкем социально-психологически да усталык велым вияҥдаш келшыше йӧным ыштыме.
Художественно-прикладной усталык зонышто чонлан келшыше сомылым шукташ, тыгыде моторике ден усталыкым вияҥдаш лиеш. Сцене да театр искусство зонышто спектакльым шындаш, концерт программым эртараш, курчак театрын постановкыжым ончыкташ, караоке дене мураш, кушташ тунемаш йӧн уло. Интернатыште илыше-влак яра жапыштыш йӧратыме фильмышт ден уш-акылым пойдарыше программыштым кугу экраныше ончен кертыт.
Психологий велым каныме йӧнан лукышто, кресле-коконыш верланен, оҥай книгам лудаш лиеш. Тыштак интернатын специалистше-влак кинезиотерапий, эрготерапий, психокоррекционный да кондуктивный терапий дене тренинг ден занятий-шамычым эртарат.
Интернат-пӧртыштӧ ынде кызытсе жаплан келшыше «Смайл» кафеат уло. Тыште шочмо кечым палемдаш, йолташ-влак коклаште моло пайремым эртараш, тыгак кочмыверысе этикетлаш тунемаш йӧнан. Интернатыште илыше-шамыч кокла гыч кажныже барменын, официантын да аниматорын пашаштым шуктен, кофемашиныште тутло кофем але шере поп-корным ямдылен кертеш. Кумылан-влак компьютер приставке, аэрохоккей але ӱстембал футбол дене модын сеҥат. Мер советын еҥже-шамыч интернатыште илыше-влак дене пырля аэрохоккей да футбол дене модыныт, тыгак у кафеште ямдылыме поп-корным уло кумылын тамленыт.
Шкем вияҥдыме да яра жапым эртарыме рӱдерыште моторлык салонат пашам ышташ тӱҥалын. Туштыжо волонтёр-шамыч интернатыште илыше кажне еҥлан мотор причёскым, маникюрым да моло процедурым ыштен кертыт. Ончыкыжым ӱдыр-влаклан гигиене да шкем эскерыме шотышто мастер-классым эртараш палемдыме.
Мер советын еҥже-шамыч интернат-пӧртысӧ сай вашталтыш-влакым ӧрын да куанен акленыт.
«Интернатыште тичмаш илыш дене илышт манын, икте-весе дене вашла мутланен, ик ошкыл почеш весым ончыко ыштена, – палемден О.Фёдорова. – Мутат уке, у залын уютшо, тематике шот дене шеледыме зоно-влак интернатыште илыше-шамычын тазалыкышт ден ментальный вияҥмашыштлан сай йӧным гына ыштат».
М.ИВАНОВА
Фотом Марий Элын Калык илышым саемдыме шотышто министерствыжын сайтше гыч налме
