«Марий Эл» газет редакцийын коллективше СВО-н сарзыже-влаклан окопышто пайдаланыме сортам вела.
Тиде суапле пашам военно-патриотический да спорт темыла дене возышо журналист Елена Эшкининан тарватымыж почеш тӱҥалме. Мо кӱлешым поген да налын ситарымеке, редакцийыште тӱҥ паша деч вара вес паша тӱҥалеш: икте консервироватлыме продукт деч ярсыше калай ате-влакым ямдыла, весе тушко, сортарӱдым шогалтен, пӱнчӧ пӱгыльмым опта, кумшо – парафиным левыктен тема… Чыла тиде уто мут деч посна да ик шонымаш дене ышталтеш: «Тек тиде партий икымше да пытартыш лиеш. Тек тиде сорта Сеҥымашым лишемда…» Да кабинетыште яра шогышо ӱстембал окопышто пайдаланыме сорта дене тич темеш.
Ик кечын редакцийышкына СВО гыч отпускыш толшо Черемис позывноян (лӱмжым да кушеч улмыжым возаш чарыш) сарзе унала пурыш. Ӱстембалне рат дене шогышо сортам ужын, куанен шыргыжале. Шинчажат чолгыжалт кайыш. «Пеш кӱлешан настам ямдыледа», – кошарварняжым нӧлталын палемдыш. «Чынак? Палаш ыле, мо дене полшымыжым…» – аптыраненрак йодым. Сарзе пеш оҥай историй дене палдарыш:
– Тыгай сортан полшымыж дене ВСУ-н «Баба-Яга» манме пеш шучко дронжым ондалена. Кузе? Строй гыч лекше УАЗ автомашинан ончыл кок сиденьышкыже йӱлышӧ кок сортам вераҥдена – пуйто водитель ден пассажир шинчат, шеҥгелнысе кум сиденьышкыжат «кум салтакым» шындена. Автомашинам маскироватлена да шкеже шылын возына.
Южышто чоҥештыше дрон УАЗ гыч лекше шокшым шижеш, машинаште вич еҥ шинчымым умыла да, ӱмбалныже чарнен, бомбым кышкаш але лӱйылташ тӱҥалеш. Тиде жапыште ме тудын ӱмбак мо дене шуын, тудын дене лӱйылтына да шучко вуверым волтен шуэна. Тидым шонен мумыланна, тушманын техникыжым пытарымыланна, а тӱҥжӧ шкенам арален кодымыланна моткоч куанена.
А эше сортам пу олмеш кучылтына. Кумыт-нылытым кӱртньӧ коҥгаш шындена да йӱштӧ блиндажым ырыктена.
Сорта тул фронтышто кочкыш ден вӱдымат, капкыл ден чонымат ырыкта, сандене йӧнда да кумылда уло гын, тудым шукыракат ямдылыза.
Мыняр пеҥгыде тыл, тунар виян фронт, маныт. Тидым таче чыла россиян умыла да СВО-н участникше-влаклан кертмыж семын полшаш тырша. Ты радамыште меат, «Марий Эл» газетын коллективше, улына, тушко тендамат ӱжына.
Маргарита ИВАНОВА
Авторын фотожо
