27 январьыште Кугу Отечественный сарын ик эн неле пагытшым шарналтена – Ленинград блокадым. Ты олам аралыше Марий кунемыште шочын кушушо 4,4 тӱжем еҥ тушан шке вуйжым пыштен.
Ленинград гыч тунам Марий АССР-ыш Кугыжаныш оптический институтым, Воено-воздущный Академийым, Оптико-механический заводым кусареныт, тыгак тулык икшыве-шамычым колтеныт.
81 ий олам утарымылан темын. Тиде кчын Марий Эл вуйлатыше Юрий Зайцев Воинын Чапшылан монумент да Курымашлык тул воктеке пеледыш аршашым пыштен.
– 900 кече блокаде шуйнен! Ленинград чыла чытен лектын. Тунам тушто илыше-влакын кочо шарнымашышт тачат чоным туржеш. Героизмышт мыланна айдемын кӧргӧ вий-куатшын примерже семын кодеш. Олам тушман деч аралыше-влак коклаште Марий кундем гычат салтак-влак лийыныт. Нунын подвигыштым да лӱмыштым ме курымеш шарнаш тӱҥалына, – каласен Юрий Зайцев.
Саргурал гыч кум гана лӱймӧ деч вара мемнан герой-влакым ик тат шып шоген шарналтеныт.
Торжественный церемонийыш тыгак Марий Эл Кугыжаныш Погын председатель Михаил Васютин, республикысе правительствын, испонительный властьын федерал органже-влакын территориальный структурыштын вуйлатышышт, мер ушем-влакын еҥышт, олаште илыше калык ушненыт.
Тидын деч вара регион вуйлатыше «Блокадысе кинде» акцийыш ушнен. Тудым Йошкар-Оласе рӱдо тӱвыра да каныме рӱдо парк республикын Молодёжный политике комитетшын полшымыж дене эртарен. Военно-патриотический клуб-влакын воспитанникышт, юнармеец, тыгак «Сеҥымашын волонтёржо-влак», «Воскресение» студент отрядын ӱдыр-рвезыже-шамыч «Блокадысе киндын» символический шултышыжым да легендарный Таня Савичеван дневникше гыч лаштыкым пуэденыт.
- «Блокадысе кинде» шарнымаш акций сар жапыште Ленинград олаште илыше калыкын лӱддымылыкшым ончыкта да кызытсе тукым тидын нерген ончыкыжымат шарнаш тӱналеш манын ӱшаным шочыкта.
Марий Эл вуйлатышын пресс-службыжын уверже негызеш Светлана Носова ямдылен.
Денис Речкинын фотожо.