Марий Эл вуйлатыше Юрий Зайцев республикыште коррупцийлан ваштареш шогымо шотышто пашам виктарыше комиссийын заседанийжым икымше гана эртарен.
Совещанийыште Марий Эл вуйлатышын администрацийже, силовой ведомствыла, прокуратур да мер ушемла гыч еҥ-влак лийыныт.
Республикын прокуроржо Илдус Нафиков ден Марий Элын элгӧргӧ паша министрже Андрей Вырвич коррупций лиймым шижтарыме да тудым кораҥдыме шотышто мо ышталтме нерген каласкаленыт. Экономический да коррупций сынан преступлений-влак бюджет сферыште, тыгак национальный проект-влакым илышыш пуртымо годым, экономикын коррупций чот вашлиялт кертме отрасльлаштыже ышталтыт. Правам аралыше орган-влаклан нуным пален налаш, тӱжваке лукташ, чаракым ышташ тӱрлӧ мерым темлыме да илышыш шыҥдараш каласыме.
Марий Эл вуйлатышын коррупцийым да моло правонарушенийым шижтарыме шотышто управленийжын вуйлатышыже Игорь Шабалин республикыште коррупций шарлымым аклаш кажне ийын эртарыме социологий шымлымашын иктешлымашыж дене палдарен.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
