Ик еҥлан шотлымаште доход илен лекташ кÿлмö окса кугыт наре огеш лек гын, шуко икшыван еш-шамыч кумшо да тылеч шуко йочам ыштымышт годым ава капитал гыч ик гана тÿлыман выплатым налын кертыт.
Марий Эл вуйлатышын пашажым жаплан шуктышо Юрий Зайцев шуко йочан еш-влаклан палемдалтше социальный полышын у мерыжым илышыш пурташ кÿштен. Тыгодым тудо шуко икшыван еш-шамычлан полшымым демографийым вияҥдымаште кÿлешан фактор семын палемден.
«Ешыште нылымше йоча шуэн лиеш. Тидымак шотыш налын, кумшо йочам ыштыше, тыгодым окса шотышто тÿнен илыше ешлан полшаш кÿлеш. Нунылан ава капитал гыч ик гана тÿлыман выплатым налаш правам пуышо чыла документым Минфин дене пырля ямдылаш кÿштем», – каласен Ю.Зайцев.
Йочан ешлан кугыжаныш велым полшымо да шуко икшыван ешын статусшым нöлталме йодышым 25 майыште Россий президент пеленысе Кугыжаныш Советын заседанийыштыже онченыт. Кугыжаныш полышлан кöра Марий Элыште шуко шочшан еш-влакын чотышт кугемын толеш. Мутлан, 2019 ийыште республикыштына 8380 тыгай еш лийын гын, тений 1 январьлан 10259 ешым шотлен лукмо.
«Республикыштына нылымше да тылеч моло йочам ыштыше еш-влаклан региональный ава капитал ойыралтеш. Социальный полышын тыгай мерыже Россий Федерацийын чыла регионыштыжак огыл уло. 2022 ийыште выплатын кугытшо 68377 теҥге лийын. Тыгай мерым ий еда 200-300 еш налеш», – палдарен Марий Эл правительстве председательын алмаштышыже Ольга Федорова.
Таче кечылан Марий Элыште социальный полышын мерыже-влак дене 260 тÿжем утла еҥым авалтыме. Пытартыш икмыняр ийыште республиканский бюджетын роскотшо кок пачаш кугемын: 2017 ийыште 3,1 миллиард теҥге лийын гын, 2021 ийыште – 6,1 миллиард теҥге.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
