Рӱдоласе Йоча да самырык-влакын полатыштышт «Илыше классике» тӱнямбал конкурсын регионысо йыжыҥже лийын.
Тушто республикна гыч 45 ӱдыр-рвезе художественный произведений гыч ужашым марла да рушла сылнын лудмо мастарлыкым ончыктен.
«Классический/кызытсе прозо произведенийын ужашыжым рушла лудмаш» номинацийыште Анна Коновалова (Волжск оласе 10-шо №-ан школ) ден Елизавета Старикова ( Т.В.Иштрикова лӱмеш «Синяя птица» гуманитарный гимназий, 5-ше класс) сеҥышыш лектыныт.
«Научный фантастике жанрысе произведений гыч ужашым лудмаш» номинацийыште эн уста Анастасия Петухова (Курыкмарий район Виловат школ, 9-ше класс) лийын .
«Марий йылме дене прозо произведений гыч ужашым лудмаш» номинацийыште палемдалтыныт:
1-ше вер – Арина Актуганова (Шернур район Кукнур школ, 8-ше класс);
2-шо вер – Арина Английская (Курыкмарий район Кузнецово школ, 5-ше класс);
3-шо вер – Доминика Матвеева (Марий Турек школ, 11-ше класс).
Ты гана марла чылаже 10 участник лудын. Конкурсышто М.Шкетанын «Парашют», Владимир Матвеевын «Марпа» да моло произведенийла гыч ужаш-влак йоҥгалтыныт. Сеҥыше-влак Марий Элын чапшым конкурсын Россий кӱкшытан финалыштыже аралат. Тудо «Артек» тӱнямбал йоча рӱдерыште эртаралтеш. Туныктышо-наставник-влаклан «Машук» шинчымаш рӱдерын утнемме сменыштыже лияш йӧн пуалтеш.
Г.Кожевникова
Фотом Марий Эл Образований да науко министерствын соцкылысе лаштыкше гыч налме.
