Таче – Еш, йӧратымаш да ӱшанле улмо кече. Тиде пайрем кузе чот чонеш логалшын маналтеш, туге?! Да тудо иканаште тынар шуко шижмашым авалта!
Очыни, кеч-могай айдемыланат эн шерге – ешыже: пелашыже, икшывыже. А кунам вате-марий коклаште йӧратымаш да пагалымаш озалана, кунам нуно икте-весыштлан ӱшанле улыт, тыгай ешыште йоча-шамычат илышлан куанен моштышо кушкыт. Тугеже тиддеч кугу пиалже эше мо уло? Лач тазалык гына докан.
Республикыштына тыгай еш шагал огыл. Тидыже моткочак куандара. Но нунын коклаште эн сайлан да пиаланлан Волжский район Упшер гыч Яранцевмыт ешым шотлыман. Вате ден марий шкештат чолга улыт да икшывыштымат тыгайымак куштат. Спорт денат кылым кучат, мураш-кушташат тале улыт, тӱрлӧ таҥасымаш ден конкурслашкат кумылын ушнат. Сандене лач тиде ешак ты кечылаште, 7-8 июльышто, Чебоксарыште эртыше «Успешная семья Приволжья» конкурсын финалыштыже Марий Элын чапшым арала. Нунылан ме уло кумылын сеҥымашым тыланена!
Любовь Камалетдинова
Фотом соцкыл гыч налме
